Naxçıvanda “Autizmi hiss et” adlı aksiya keçirilib
Naxçıvan şəhərində Naxçıvan Muxtar Respublikası Əmək və Əhalinin Sosial Müdafiəsi Nazirliyi, Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi, “Regional İnkişaf” İctimai Birliyi və “Autizmli Uşaqlara Dəstək” İctimai Birliyinin təşkilatçılığı ilə “Autizmi hiss et” adlı aksiya keçirilib.
“Azərbaycan müəllimi” xəbər verir ki, “Saat Meydanı” Kompleksində təşkil olunan aksiyanın rəsmi hissəsində iştirakçıları salamlayan “Autizmli Uşaqlara Dəstək” İctimai Birliyinin təsisçisi və sədri Ayaz Seyidli tədbirin autizm haqqında ictimai maarifləndirmənin artırılması və inklüziv cəmiyyətin formalaşdırılması baxımından əhəmiyyətindən bəhs edib.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin əməkdaşı Elsun Cahangirli Türkiyə Respublikasının Naxçıvandakı Baş Konsulu Asip Kaya və Naxçıvan Muxtar Respublikasının Ali Məclisinin deputatı Üzeyir Məmmədov autizmli şəxslərə qarşı cəmiyyətin həssaslığının artırılmasının, onların cəmiyyətə inteqrasiyasının dəstəklənməsinin inklüziv mühitin təşviqinə yönəlmiş təşəbbüslərin əhəmiyyətini vurğulayıblar.
Aksiyanın bədii hissəsində autizmli və digər uşaqların iştirakı ilə musiqi, rəqs və müxtəlif yaradıcılıq nömrələri təqdim olunub. Bununla yanaşı, autizmli uşaqların hazırladıqları rəsm və əl işlərindən ibarət sərgi nümayiş etdirilərək ziyarətçilərə onların yaradıcılıq nümunələri ilə yaxından tanış olmaq imkanı yaradılıb.
Aksiya çərçivəsində iştirakçılar VR (virtual reallıq) texnologiyası vasitəsilə autizmli uşaqların gündəlik həyatda qarşılaşdıqları çətinlikləri əks etdirən xüsusi təcrübədə iştirak edib, autizm mövzusunda maarifləndirici guşələrdə məlumatlandırıcı materiallarla tanış olublar. Eyni zamanda, autizmli uşaqlara və onların ailələrinə dəstək mesajlarının yazıldığı xüsusi lövhə, həmçinin inklüzivlik mövzusunda hazırlanmış foto zona fəaliyyət göstərib.
Aksiyanın təşkilinə “Regional İnkişaf” İctimai Birliyinin könüllüləri yaxından dəstək göstəriblər.
Qeyd edək ki, aksiyanın əsas məqsədi autizm haqqında ictimai maarifləndirmənin artırılması, autizmli şəxslərə qarşı cəmiyyətdə anlayış və empatiya hissinin gücləndirilməsi, inklüzivliyin təşviqi və autizmli uşaqların cəmiyyətə inteqrasiyasına dəstək göstərilməsi olub.
