Aprelin 7-də Azərbaycan Dövlət Neft və Sənaye Universitetində (ADNSU) Gənc tədqiqatçıların və doktorantların “Elm Günü”nə həsr olunmuş böyük elmi seminarı keçirilib. 

ADNSU-dan “Azərbaycan müəllimi”nə bildirilib ki, seminarda universitetin elmi işlər üzrə prorektoru, professor Lətafət Qardaşova çıxış edərək respublikada elm sahəsində son illər qəbul edilən qərarlar və onların elmin inkişafına təsiri haqqında məlumat verib. Süni intellekt strategiyasının təsdiqi və onun əhəmiyyəti, tədqiqatçıların daha çox diqqət etmələri elmi istiqamətlərdən və mövcud problemlərdən söz açan professor Lətafət Qardaşova gələcəyin alimlərinin elmi potensialının inkişaf etdirilməsi üçün universitetdə yaradılan şəraitin qənatbəxş oldğunu bildirib. O, gəncləri bu imkandan faydalanmağa səsləyib. 

ADNSU-nun Doktorantura şöbəsinin müdiri, dosent Zülfüqar İbrahimlinin moderatorluğu ilə keçirilən seminarda doktorantlar  “Maqnit sahəsindən istifadə etməklə neft yataqlarının işlənmə səmərəliliyinin artırılması”(doktorant Elnur Əlizadə), “Desulfurization of Vacuum Gas Oil in the Presence of Ozone”(doktorant Xamis Abiyev), “Dənizdə üzən və səviyyəsi tənzimlənən külək turbin platformasının işlənməsi”(doktorant Mahmud İsmayılov), “Semantic-Based XAI: Leveraging Ontology Properties to Enhance Explainabilitiy”(doktorant Pavel Kosov), “AI and Decision- Making (Reshaping Organizational Strategies)”(Əliş Nəzərov) və “Using Zadeh`s implication for approximate reasoning”(doktorant Şamil Əhmədov) mövzuları üzrə çıxış ediblər. Məruzəçilər seminar iştirakçılarının suallarını cavablandırıblar və müzakirələr aparılıb. Sonra dosent Zülfüqar İbrahimli doktorantların təhsil müddəti başa çatanadək müdafiə etmələri üçün daha çox çalışmalı olduqlarını və tədqiqatla bağlı problemləri həll etmək üçün müvafiq prosedurlarda şöbənin dəstək olduğunu vurğulayıb. 

Sonda Elmi işlər üzrə prorektor, prof. Lətafət Qardaşova doktorantlara elmi tədqiqatların aparılması və nəşrlərlə bağlı tövsiyələrini verib, elmi dərəcə almaq üçün Ali Attestasiya Komissiyasının elmi nəşrlərə olan tələblərini xatırladıb. O, tədqiqatla məşğul olarkən son on ilin məqalələrinə üstünlük vermək, müasir texnologiya və yanaşmalardan istifadə etmək, kompüter simulyasiyası aparmaq və yeniliklərin müasir elmin tələblərinə uyğun olmasına diqqət etməyin vacibliyini vurğulayıb. Sonda doktorantları maraqlandıran suallar cavablandırılıb.