Beynəlxalq Müəllimlər Günü insanlıq üçün ən dəyərli və ən şərəfli peşə olan müəllimliyə və müəllimə ehtiramın göstərildiyi gündür. 5 oktyabr təqvimin bir günü olmaqdan başqa bizə bir çox dəyərləri xatırladan gündür.

5 oktyabr! 
Vətəninə, millətinə, xalqına, bayrağına, milli mənəvi dəyərlərinə, ailəsinə, elinə-obasına, dövlətinə və dövlətçiliyinə sadiq insanları, vəfalı oğul və qızları yetişdirənlərin, yəni əziz müəllimlərimizin günüdür.

5 oktyabr! 
Öyrədənlərin, öyrənənlərin, nümunə olanların, rəhbərlik və bələdçilik edənlərin, həyata ilkin addımlarını atan fidan balalarımıza yol göstərənlərin, işıq saçanların, yəni dəyərli müəllimlərimizin günüdür.  

5 oktyabr!
Sinif otaqlarında sadəcə lövhəyə yazı yazanların, bildiklərini təbliğ edənlərin deyil, şagirdlərimizin, bizim övladlarımızın qəlbinə, ruhuna toxuna bilənlərin, onlara ümid verənlərin, onlara inananların, onları cəsarətləndirənlərin, onlara dəyər verənlərin, onlarla gülüb, onlarla sevinib, yeri gəldiyində onlarla ağlaya bilənlərin, yəni sevimli müəllimlərimizin günüdür.

5 oktyabr!
Müəllimlik anlayışının, müəllimliyi empatiya etmənin, müəllimlərin səbrinə, fədakarlıqlarına, onların əməyinə, yükünə və məsuliyyətinə, bir sözlə onların böyük, amma çox böyük ürəklərinə heyran olma günüdür.

5 oktyabr! 
Müəllimlərin, yəni savadlıların, mərhəmətli olanların, gülərüzlü, yaxşı olanların, yoxluqlarında darıxılanların, empatiya edə bilənlərin, dinləyə bilənlərin, qarşısındakı şagirdlərin kimliyindən asılı olmayaraq onlara sevgi ötürə bilənlərin günüdür. Məzun olduqlarında riyaziyyat, fizika, ədəbiyyat müəllimi kimi məzun olan, ancaq məktəblərimizdə fənn müəllimindən daha çox şagirdin müəllimi olanların günüdür! 

5 oktyabr! 
Güvən verənlərin, etibar edilənlərin günüdür. Effektiv və məhsuldar öyrənmə mühiti qarşılıqlı güvən və etimadın olduğu mühitdir. Qarşılıqlı güvən və etimad isə sağlam ünsiyyətin formalaşması ilə mümkündür. Ünsiyyətin ilk addımı təbəssümdür. Təbəssümü qarşılıqsız ətrafına paylaya bilənlərin günüdür.

Müəllimin əlinin dəymədiyi xəmir ya dadsızdır, ya da duzsuzdur. 

Gözəl vətənimizin şirin balalarının hər birinə bilik, sevgi və ən əsası ümid toxunuşlarını etməyimiz diləyi ilə başda riyaziyyat müəllimim olan atam olmaqla, bütün Azərbaycan müəllimlərini ürəkdən təbrik edirəm!

Fuad QARAYEV,
Azərbaycan Respublikasının Təhsil İnstitutunun direktor müavini