Yanvarın 17-də  İOEUG Gimnastika məktəbi "Elf diyarı" adlı Yeni il şousu ilə xüsusi və möhtəşəm bir tədbirə imza atıb.

"Azərbaycan müəllimi" xəbər verir ki, tədbirin əvvəlində Qazaxıstanın Aktau şəhərində baş vermiş faciəvi təyyarə qəzasında həyatını itirənlərin xatirəsi birdəqiqəlik sükutla yad edilib.

Gimnastika məktəbində təşkil olunan bu rəngarəng şouda gimnastika bacarıqlarını əyləncəli şəkildə təqdim edən gimnastlar yeni il mövsümünün sehrini canlandırıblar.

"Elf diyarı"nda Yeni il şousu məktəbin müxtəlif yaş qruplarından olan gimnastların iştirakı ilə təşkil edilib.

Məşhur uşaq nağıllarından ilham alınaraq qurulan şouda balaca iştirakçılar elf obrazlarını canlandırıb, musiqi və rəqslə yeni il mövsümünün sevincli atmosferini yaşadıblar. Şouda müxtəlif gimnastika növlərindən istifadə edilərək bədii təqdimatlar, akrobatik hərəkətlər və rəqslər bir araya gətirilib.

Gimnastika məktəb rəhbərliyi, bu tip tədbirlərin uşaqların sosial bacarıqlarını inkişaf etdirmək, onları komandada işləməyə təşviq etmək və yeni il ruhunu bir arada paylaşmaq baxımından çox önəmli olduğunu vurğulayıb.

Məktəbin gələcəkdə də belə şoular təşkil etməyi və gimnastika sənətini daha geniş auditoriyaya tanıtmağı hədəflədiyini bildirib.

Şouda iştirak edən hər kəsin üzündə sevinc və məmnuniyyət dolu anlar yaşanıb və məktəb bir daha idmanın əyləncə və incəsənətlə necə harmoniya təşkil etdiyini nümayiş etdirib.