Təhsilverənlərin bugünkü sertifikatlaşdırılma imtahanında biologiya və kimya müəllimləri öz biliklərini sınayıblar.

Prosesin şəffaf və ədalətli şəkildə keçirildiyini deyən müəllimlər imtahanla bağlı təəssüratlarını “Azərbaycan müəllimi” ilə bölüşüblər. 

114 nömrəli tam orta məktəbdə çalışan biologiya müəllimi Fəridə Quliyeva imtahandan 58 bal toplayıb. Onun sözlərinə görə, imtahanda müəllimlərə təqdim olunan suallar normal idi və yazıla biləcək səviyyədə tərtib olunmuşdu.

307 nömrəli məktəbdə biologiya müəllimi kimi çalışan Şölə Mirzəyeva da imtahan prosesindən razı qalıb. O, imtahanda 57 bal toplayıb. Qeyd edir ki, hər bir müəllim öz ixtisasını yaxşı səviyyədə bilməlidir: “Müəllim dərs keçdiyi fənni yaxşı bilməlidir, buna görə də imtahan üçün xüsusi hazırlığa ehtiyac yoxdur”.

Arzu Gözəlova da yüksək bal toplayaraq həmkarlarından seçilən müəllimlərdən biridir. 307 nömrəli tam orta məktəbdə pedaqoji fəaliyyət göstərən Arzu müəllim uzun illərdir ki, biologiya fənnini tədris edir və bu imtahandan 56 bal toplayıb. Onun fikrincə, bu imtahan müəllimlərin öz üzərində çalışmağa təşviq edən və inkişaf etdirən bir prosesdir: “Sertifikatlaşdırma müəllimlərin öz üzərində çalışması, özünü təkmilləşdirməsi baxımından çox vacibdir. İmtahanın daha çətin olacağını düşünürdüm, amma gözlədiyimdən asan oldu. Məktəbdə dərs deyən, şagirdlərin qarşısına çıxan istənilən müəllim bu sualları cavablandıra bilərdi”.

14 nömrəli tam orta məktəbin biologiya müəllimi Əli Əsədullayev 53 bal toplayıb. O bildirib ki, imtahan tam şəffaf şəkildə keçib və ümumilikdə təşkilatçılıqdan razı qalıb. 

114 nömrəli tam orta məktəbdə çalışan biologiya müəllimi Rufanə Rəsulova isə 53 bal toplayıb və imtahanın şəffaf şəkildə keçirildiyini vurğulayıb.

112 nömrəli tam orta məktəbin biologiya müəllimi Leyla Məmmədova isə 53 bal toplayıb. O bildirib ki, suallar dərsliklərdə olan mövzuları əhatə edib: “Artıq yazanda balımı təxmin edirdim. Suallar səviyyələr üzrə bölünmüşdü, ümumiyyətlə, dərslikdə olan mövzulardan kənar heç bir sual salınmamışdı”.

İmtahan iştirakçıları qeyd edirlər ki, sualların asan, orta və çətin səviyyələrdə tərtib olunması imtahan iştirakçılarının səriştələrini qiymətləndirməyə və onların peşəkar ehtiyaclarını müəyyən etməyə imkan verir. Bu həm müəllimlərin inkişafına, həm də ümumi təhsil keyfiyyətinə birbaşa təsir göstərir.