İndoneziyanın Şərqi Yava əyalətində yerləşən “Al Xoziny” internat məktəbinin binasının çökməsi nəticəsində ölənlərin sayı 54 nəfərə yüksəlib. 

“Azərbaycan müəllimi” xarici KİV-ə istinadən xəbər verir ki, xilasetmə qrupları hələ də dağıntılar altında qalan bir neçə nəfərin axtarışını davam etdirirlər.

Hadisə ötən həftə məktəbdə tikinti işləri aparıldığı vaxt baş verib. 

İndoneziya Fəlakətlərin Azaldılması Agentliyinin məlumatına görə, bu, ölkədə 2025-ci ilin ən çox insan tələfatı ilə nəticələnən hadisəsidir. Axtarış-xilasetmə əməliyyatlarının gün sonuna qədər tamamlanacağı gözlənilir.

Rəsmilər hadisənin səbəblərini araşdırır. İlkin ehtimala görə, ikimərtəbəli binanın çökməsinə zəif bünövrə səbəb olub. 

Ölənlər arasında dağıntılar altından sağ çıxarılsa da, sonradan xəstəxanada dünyasını dəyişən iki nəfər də var.

Xilasetmə əməliyyatları binanın “qat-qat çökmə” forması səbəbindən çətinliklə aparılır. Bəzi xilasetmə qrupları yalnız dar boşluqlardan irəliləyə biliblər.

Rəsmilərin sözlərinə görə, son həftələrdə məktəbdə aparılan beton tökmə işləri binanın yükünü artıraraq onun “pankek effekti” ilə çökməsinə səbəb olub.