“Yüksəliş” müsabiqəsinin qaliblərinin iştirakı ilə həyata keçirilən sayca ikinci Tələbə Mentorluq Proqramı uğurla yekunlaşıb. 

“Azərbaycan müəllimi” xəbər verir ki, proqram çərçivəsində 12 müxtəlif universitetdən seçilmiş 80 tələbə Mentorluq Proqramına cəlb olunub. Onlardan 54 nəfəri proqramı uğurla tamamlayaraq sertifikatla təltif edilib.

Tədbirdə çıxış edən gənclər və idman nazirinin müavini, “Yüksəliş” müsabiqəsinin İşçi Qrupunun rəhbəri Fərhad Hacıyev Tələbə Mentorluq Proqramının gənclərin inkişafında oynadığı rolu yüksək qiymətləndirib, bu təşəbbüsün onların karyera yolunda mühüm dayaq olduğunu vurğulayıb.

Bakı Ali Neft Məktəbinin rektoru Elmar Qasımov isə çıxışında Mentorluq Proqramında iştirak edən tələbələrin fəallığını və əldə olunan real nəticələri xüsusi qeyd edib. O, proqramın həm tələbələr, həm də qaliblər üçün qarşılıqlı öyrənmə və inkişaf imkanı yaratdığını bildirib.

Tədbirdə çıxış edən müsabiqə qalibləri, işçi qrupunun üzvləri və tələbələr Tələbə Mentorluq Proqramı çərçivəsində qazanılan qarşılıqlı təcrübələri bölüşərək bu proqramın gənclərin inkişafında mühüm rol oynadığını vurğulayıblar. Onlar tələbələrlə iş prosesində əldə olunan nəticələrin gələcək nəsillərin formalaşmasında töhfə verdiyini qeyd ediblər.

Bu mərhələdə mentorlar tərəfindən tələbələr üçün 20 təlim təşkil olunub, ümumilikdə 396 mentorluq görüşü baş tutub. Proqramda “Yüksəliş” müsabiqəsinin 1-ci, 2-ci və 3-cü müsabiqəsinin qalibləri daxil olmaqla, 28 nəfər mentor kimi iştirak edib və tələbələrə bilik, təcrübə və bacarıqlarını ötürüblər.

Tələbələrin bir qismi mentorların dəstəyi ilə işlə təmin olunub, bir çoxu isə təcrübə proqramlarına qoşularaq müxtəlif layihələrdə aktiv iştirak edib. Mentorlar və tələbələr arasında qurulan əməkdaşlıq onların şəxsi inkişafına, peşəkar bacarıqlarının formalaşmasına və gələcək karyera istiqamətlərinin müəyyənləşməsinə mühüm töhfə verib.

Qeyd edək ki, 2023-2024-cü illərdə birinci dəfə təşkil olunan Tələbə Mentorluq Proqramı uğurla həyata keçirilib.

"Yüksəliş" müsabiqəsi Azərbaycan Respublikasının Prezidenti cənab İlham Əliyevin 26 iyul 2019-cu il tarixli Sərəncamı ilə təsis edilib. Müsabiqənin qalibləri mentorlar tərəfindən birillik fərdi inkişaf planı ilə təmin olunur və 20 min manatlıq mükafat qazanırlar. Sayca beşinci “Yüksəliş” müsabiqəsinin keçirilməsi ilə bağlı Azərbaycan Respublikasının Prezidenti cənab İlham Əliyev tərəfindən 18 dekabr 2024-cü il tarixində müvafiq Sərəncam imzalanıb