“Monitorinqlər çərçivəsində internat tipli təhsil müəssisələrində uşaqlara göstərilən psixoloji xidmət səviyyəsinin müsbət olduğu müşahidə edilib”.

Bu barədə “Azərbaycan müəllimi”nin sorğusuna cavab olaraq Azərbaycan Respublikasının İnsan Hüquqları üzrə Müvəkkili (Ombudsman) Aparatından məlumat verilib.

Qeyd edilib ki, sağlamlıq imkanları məhdud olan uşaqların təhsil aldığı internat məktəblərində azyaşlıların psixi sağlamlığına göstərilən diqqətin artırılması, uşaqlarla psixoloji işin aparılmasında müvafiq standartlaşdırılmış sənədlərin, fərdi iş planlarının formalarının işlənib hazırlanması, bu istiqamətdə məşğələlərin aparılması üçün kabinetlərin əyani vəsaitlərlə təmin olunması zəruridir. Psixoloq və digər mütəxəssislərin çatışmazlığı ilə bağlı məsələ Ombudsmanın diqqətində saxlanılır:

“Əqli və fiziki inkişafında pozuntular olan uşaqlar üçün internat tipli xüsusi ümumtəhsil məktəblərinin rəhbər işçiləri, inzibati təsərrüfat, tədris-yardımçı və xidmət işçiləri heyətinin nümunəvi ştatları”nda “tibb bacısı”, “gecə dayəsi” və “psixoloq” ştatlarının sayının artırılması tövsiyə edilib”.

Məlumatda bildirilib ki, başçəkmələrin təhlilinə əsasən penitensiar müəssisələrdə psixoloji yardımın səmərəli təşkili istiqamətində tədbirlərin gücləndirilməsi zəruri hesab olunur. Qapalı müəssisələrdə saxlanılan və psixi sağlamlığına potensial təhlükə yarana biləcək şəxslərə keyfiyyətli və adekvat yardımın göstərilməsinə ehtiyac vardır.

Qeyd edək ki, Ombudsman yetkinlik yaşına çatmayan məhkumların təhsil hüququnun təmin edilməsi vəziyyətinə, islah olunmalarına və azad olunduqdan sonra cəmiyyətə inteqrasiyası prosesinə nəzarətin gücləndirilməsini təklif edib.