Abşeron rayonu İxtisaslaşdırılmış Olimpiya Ehtiyatları Uşaq–Gənclər İdman–Şahmat Məktəbinin yetirməsi Rəvan Həsənzadə Gəncə şəhərində keçirilən MDB Oyunlarında yüksək nəticə göstərərək qızıl medal qazanıb.

“Azərbaycan müəllimi” qalib idmançı ilə tanış olaraq onun təəssüratlarını öyrənib.

Rəvan Həsənzadə Binəqədi rayonunun Sulutəpə qəsəbəsində yerləşən 217 nömrəli tam orta məktəbin məzunudur. Hazırda Azərbaycan İdman Akademiyasında sərbəst güləş üzrə “Məşqçilik” ixtisasının birinci kursunda təhsil alır. Rəvan 5 ilə yaxındır ki, Abşeron rayonu İxtisaslaşdırılmış Olimpiya Ehtiyatları Uşaq–Gənclər İdman–Şahmat məktəbində məşqçi Mircəlal Həsənzadədən sərbəst güləş üzrə dərslər alır və xeyli uğurlara sahibdir:

“Mən artıq 8 ilə yaxındır ki, sərbəst güləşlə məşğulam. Bu zamana qədər dəfələrlə Azərbaycan çempionu olmuşam, keçən il sərbəst güləş üzrə dünya üçüncüsü olmuşdum. Bu il yenidən Azərbaycan çempionu olmuşam”. 

MDB Oyunlarında yüksək nəticə göstərərək qızıl medal qazanan Rəvan bu haqda belə deyir: 

“Biz bu yarışa yaxşı hazırlaşmışdıq və nəticəmiz əla oldu. Sonuncu yarışda Özbəkistan, Rusiya, Belarus idmançılarına qalib gələrək çempion oldum və qızıl medala layiq görüldüm. Çox sevincliyəm! Amma qarşıdan gələn yarışlara əzmlə hazırlaşıb daha gözəl nəticələr əldə etmək istəyirəm, hazırda məqsədim yalnız budur”.