Azərbaycan Təhsil İşçiləri Azad Həmkarlar İttifaqı (ATİAHİ) Respublika Komitəsinin təşəbbüsü və təşkilatçılığı,Peşə Təhsili üzrə Dövlət Agentliyinin dəstəyi ilə yeni layihçərçivəsində təlimlərə start verilib.

“Azərbaycan müəllimi” xəbər verir ki, layihənin məqsədi peşə təhsilinin keyfiyyətini artırmaq, tədris prosesində innovativ pedaqoji yanaşmaların tətbiqini təşviq etmək, mühəndis-pedaqoji heyətin peşəkar bacarıqlarını inkişaf etdirmək, eləcə də əmək bazarının tələblərinə uyğun ixtisaslı kadrların hazırlanmasına dəstək olmaqdır.

Təlimlər dörd əsas istiqamət üzrə aparılır:

          •         Layihələrin idarəedilməsi

          •         Karyera hazırlığı və şəxsi inkişaf

          •         Yumşaq bacarıqlar

          •         Microsoft Excel proqramı üzrə bacarıqlar

Təlim modulları iştirakçı qrupların ehtiyacları nəzərə alınmaqla hazırlanıb. “Layihələrin idarəedilməsi”, “Yumşaq bacarıqlar” və “Excel” təlimləri təhsilverənlər üçün nəzərdə tutulub və onların pedaqoji, eləcə də şəxsi inkişafına yönəlib. “Karyera hazırlığı və şəxsi inkişaf” təlimləri isə təhsilalanlara ünvanlanıb və onların əmək bazarına daha hazırlıqlı şəkildə inteqrasiyasına dəstək verməyi hədəfləyir.

Təlimlərə əsasən həmkarlar ittifaqlarının üzvü olan tələbələr cəlb olunub. 

Layihənin 10 may 2025-ci il tarixinədək davam etməsi nəzərdə tutulur. Proqramı uğurla başa vuran bütün iştirakçılar sonda sertifikatla təltif olunacaqlar.

Bu təşəbbüs peşə təhsili sisteminin davamlı inkişafı, müasir əmək bazarının tələblərinə cavab verən insan kapitalının formalaşdırılması və ümumilikdə tədris keyfiyyətinin artırılması baxımından mühüm əhəmiyyət kəsb edir.