Qəbələdə peşə təhsili və əmək bazarı arasında əməkdaşlıq üzrə konfrans keçirilib
Qəbələ Dövlət Peşə Təhsil Mərkəzində “Peşə təhsili və əmək bazarı əməkdaşlığının gücləndirilməsi” mövzusunda regional konfrans keçirilib.
Mərkəzdən "Azərbaycan müəllimi"nə bildirilib ki, tədbirdə Peşə Təhsili üzrə Dövlət Agentliyinin nümayəndələri, Qəbələ, İsmayıllı, Oğuz, Qax və Şəki Peşə Təhsil Mərkəzlərinin direktorları, regionda fəaliyyət göstərən işəgötürənlər və sahibkarlar iştirak ediblər.
Konfrans çərçivəsində peşə təhsil mərkəzlərinin təşkil etdiyi sərgidə təhsilalanların hazırladığı iş nümunələri və praktiki bacarıqları nümayiş olunub.
Açılış mərasimində Qəbələ Dövlət Peşə Təhsil Mərkəzinin direktoru mərkəzin fəaliyyəti, inkişaf yolu və gələcək hədəfləri barədə məlumat verib, peşə təhsilinin əmək bazarının tələblərinə uyğunlaşdırılmasının vacibliyini vurğulayıb.
Panel müzakirələrdə regionda işəgötürənlərin tələbləri və peşə təhsili müəssisələri üçün yeni çağırışlar və işəgötürən–peşə təhsil mərkəzləri əməkdaşlığı, dual təhsil, birgə layihələr, startap təşəbbüsləri müzakirə olunub.
Tədbir çərçivəsində Qəbələ Dövlət Peşə Təhsil Mərkəzi ilə “Tatun Travel” MMC arasında əməkdaşlıq memorandumu imzalanıb.
