Beynəlxalq STEAM Azərbaycan Festivalının (SAF 2025) hazırlıq işləri yekunlaşmaq üzrədir. Şəhər məktəbləri ilə yanaşı region məktəbləri də  bu il də festivala müxtəlif kateqoriyalar üzrə qoşulacaqlar. 

“Azərbaycan müəllimi” xəbər verir ki, SAF 2025 Festivalında bu il Astara rayonundan 4 komanda iştirak edəcək. Astara rayonu Deqadi kənd tam orta və Qapçıməhəllə kənd ümumi orta məktəblərindən 2 komanda olmaqla ümumilikdə 4 komanda SAF 2025-də iştirak edəcək. Deqadi məktəbinin V sinif şagirdləri “Fast and Furious”, IV və VII sinif şagirdləri isə "VidX" kateqoriyasında yarışacaqlar.  

Komandaların mentoru məktəbin informatika müəllimi Nemət Tarverdiyevdir. 

Qapçıməhəllə kənd ümumi orta məktəbi festivalda təmsil edəcək komandaların mentoru Vüsalə Rüstəmova bildirib ki, SAF 2025 Festivalının “Rolling Minds” kateqoriyasında “Brain Sparks” adlı komanda ilə yarışacaqlar.

““Rolling minds” kateqoriyası üzrə yarış 8-10 yaşlı şagirdlər üçün nəzərdə tutulub. Biz də IV sinif şagirdləri ilə qoşulacağıq. Bu yarış beyin fəaliyyətini stimullaşdırır, analitik düşüncə, üçölçülü təsəvvür və əməkdaşlıq kimi qabiliyyətləri inkişaf etdirməyə təşviq edir. Eyni zamanda tədqiqat ruhunu gücləndirən bu yarış, uşaqların öyrəndiklərini praktik şəkildə tətbiq etməklə biliklərini möhkəmləndirmələrinə imkan yaradır və onların gələcəkdə daha kompleks problemlərlə mübarizə aparmaq bacarıqlarını artırır. “CubeSat” kateqoriyasi üzrə “Sky Coders” adlı komandamız yarışacaq. Bu kateqoriya üzrə yarış 13-17 yaşlı şagirdlər üçün nəzərdə tutulub. Bizim komanda VIII sinif şagirdlərindən təşkil olunub. Bu yarışda komandalar elektronika, proqramlaşdırma, simsiz xəbərləşmə və idarəetmə, alternativ enerjilər və dizayn bacarıqlarını birləşdirərək öz mini peyklərini hazırlayırlar”.

Qeyd edək ki, Beynəlxalq STEAM Azərbaycan Festivalı (SAF 2025) Elm və Təhsil Nazirliyinin dəstəyi, STEAM Azərbaycanın təşkilatçılığı ilə 17-19 noyabr tarixlərində Bakı Ekspo Mərkəzində keçiriləcək. Bu festival artıq 5-ci ildir ki, təşkil olunur və ənənəvi olaraq regionun ən böyük elm və texnologiya tədbirlərindən biri kimi tanınır.