Peşə məktəblərinin yetirmələri Çində keçirilən yarışda 3-cü oldular
Azərbaycanın peşə təhsili sahəsində yetişən gənc mütəxəssislər Çində 34 ölkənin qatıldığı beynəlxalq yarışda "Dronların yığılması və uçuşu" kateqoriyası üzrə 3-cü yerə çıxıb.
Bu barədə Sənaye və İnnovasiyalar üzrə Bakı Dövlət Peşə Təhsil Mərkəzinin direktoru Şaban Çəərçiyev “Azərbaycan müəllimi”nə açıqlamasında bildirib.
Onun sözlərinə görə, peşə təhsilində növbəti uğura imza atan gənclərdən biri Sənaye və İnnovasiyalar üzrə Bakı Dövlət Peşə Təhsil Mərkəzinin "Elektronika ustası" ixtisası üzrə məzunu Əli Məmmədovdur.
Digər gəncin isə hazırda peşə təhsili davam edir. O, Bərdə Dövlət Peşə Təhsil Mərkəzinin "Dronların texniki xidməti və təmiri üzrə mütəxəssis" ixtisasında təhsil alan Rauf Mirzəyevdir:
“Onlar 30 iyun – 4 iyul 2026-cı il tarixlərində Çin Xalq Respublikasının Quançjou şəhərində keçirilən “CICA Skills Competition 2026” beynəlxalq yarışmasında "Pilotsuz uçuş aparatlarının yığılması, sazlanması və texniki xidməti” (UAV Assembly, Adjustment and Maintenance) kateqoriyası üzrə ölkəmizi təmsil edərək III yerə layiq görülüblər. CICA-ya üzv və müşahidəçi olmaqla ümumilikdə 34 ölkənin iştirak etdiyi bu nüfuzlu beynəlxalq yarışmada qazanılan uğur Azərbaycan peşə təhsilinin inkişafını, gənclərimizin peşəkar hazırlıq səviyyəsini, innovativ düşüncə tərzini və yüksək texnologiyalar sahəsində formalaşdırdıqları bacarıqların beynəlxalq müstəvidə yüksək qiymətləndirildiyini bir daha nümayiş etdirir”.
