Qəbələdə Zəfər tariximizə həsr olunmuş tədbir təşkil edilib
Sentyabrın 30-da Qəbələ rayonunda gənclərin vətənpərvərlik ruhunda formalaşmasına, Vətən müharibəsi iştirakçılarının keçdiyi şərəfli döyüş yolunun gənc nəslə çatdırılmasına həsr olunmuş “Qəhrəmanlarımızı tanıyaq” adlı görüş keçirilib.
"Azərbaycan müəllimi" xəbər verir ki, görüş Şəki-Zaqatala Regional Gənclər və İdman İdarəsi və Qəbələ Dövlət Peşə Təhsil Mərkəzinin birgə təşkilatçılığı ilə keçirilib.
Tədbirdə mühəndis-pedaqoji heyət, Vətən müharibəsi iştirakçısı olan veteran müəllimlər və tələbələr, eləcə də digər tələbələr iştirak ediblər.
Tədbir Azərbaycan Respublikasının Dövlət Himninin səsləndirilməsi və şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Görüş zamanı Vətən müharibəsi iştirakçıları tələbələrlə öz döyüş xatirələrini bölüşüb, keçdikləri şərəfli döyüş yolundan və Vətən uğrunda göstərdikləri fədakarlıqlardan danışıblar.
Çıxışlarda gənclərin vətənpərvərlik ruhunda yetişdirilməsinin, Zəfər tariximizin gələcək nəsillərə çatdırılmasının və milli-mənəvi dəyərlərimizin qorunmasının əhəmiyyəti vurğulanıb.
Görüş çərçivəsində Vətən müharibəsi və Zəfər tariximizə həsr olunmuş videoçarxlar da nümayiş etdirilib.
Qəhrəmanlarımızın keçdiyi yol bizim tariximiz, onların göstərdiyi fədakarlıq isə gələcək nəsillər üçün örnəkdir!
