STK-da "Yaşıl kollec" layihəsi çərçivəsində növbəti tədbir keçirilib
Sənaye və Texnologiya Kollecində ekoloji maarifləndirmə və ətraf mühitin mühafizəsi məqsədilə "Yaşıl kollec" layihəsi çərçivəsində “Təbiət fənləri” fənn birləşməsinin sədri Səidə Bayramova və tədris emalatxana müdiri Xatirə Quliyevanın təşkilatçılığı, həmçinin ECO START-UP klub üzvlərinin iştirakı ilə növbəti “Təbiətə töhfəmiz” adlı tədbir keçirilib.
"Azərbaycan müəllimi" xəbər verir ki, tədbiri giriş sözü ilə açan kollecin direktoru, professor Nasim Abışov təbiəti qorumağın hər bir fərdin mənəvi borcu olduğunu vurğulayıb, "Yaşıl dünya naminə həmrəylik" ideyasının əhəmiyyətindən bəhs edib. O, bu cür təşəbbüslərin gənclərdə ekoloji mədəniyyətin formalaşmasında mühüm rol oynadığını bildirib. Daha sonra "Təbiət fənləri" fənn birləşməsinin sədri Səidə Bayramova və tədris emalatxana müdiri Xatirə Quliyeva çıxış edərək, layihənin təhsil müəssisəsinin ekoloji mühitinə müsbət təsirindən və tələbələrin bu prosesdə aktiv iştirakının vacibliyindən danışıblar. Rəsmi hissədən sonra “Dekorativ tətbiqi sənət (zərgərlik)” və “Ətraf mühit” ixtisaslarında təhsil alan tələbələrin təbiətə həsr olunmuş əl işləri sərgiləndi. Tədbir iştirakçılar tərəfindən böyük maraqla qarşılanıb. Sonra aksiya çərçivəsində kollecin əməkdaşları və tələbələrin iştirakı ilə müəssisənin həyətyanı sahəsində müxtəlif növ həmişəyaşıl ağaclar və bəzək bitkiləri əkilib və mövcud yaşıllıqlara aqrotexniki qulluq göstərilib.
