Türkiyə universitetlərinə tələbə qəbulu rekord həddə çatdı
Dünyanın aparıcı ali təhsil sistemləri tələbə sayının azalması ilə üzləşərkən Türkiyə universitetlərinə qəbul sayında tarixi irəliləyiş qeydə alınıb. Bu özünü ali məktəblərə yerləşdirmə (YKS) nəticələrində əks olunub.
“Azərbaycan müəllimi” xəbər verir ki, yerləşdirmə prosesində dövlət universitetlərində mövcud olan 481.684 yerdən 479.392-si tutulub. Bu, qəbul nisbətinin 99.52%-ə çatması ilə nəticələnib.
"Gənclərimiz ali təhsildə daha yaxşı gələcəyə aparan qapıları görürlər"
Ali Təhsil Şurasının (YÖK) prezidenti Erol Özvar bildirib ki, 2026-cı il YKS yerləşdirmə nəticələri "sadəcə statistika" kimi qəbul edilməməlidir: "Nəticələr gənclərimizin və onların ailələrinin ölkəmizin gələcəyinə olan ümidini nümayiş etdirir. Dünyanın bir çox inkişaf etmiş ali təhsil sistemində universitetlərə qəbulun azaldığı bir vaxtda universitetlərimizə göstərilən bu yüksək maraq olduqca dəyərlidir".
E.Özvar əlavə edib: “Bu, o deməkdir ki, gənclərimiz ali təhsil vasitəsilə daha yaxşı gələcəyə ümid bəsləyirlər. Ailələrimiz də övladlarının gələcəyini universitetlərimizdə görürlər.
Dövlət universitetlərimizdə qəbul nisbətinin 99,52%-ə çatması bu inamın və ümidin çox bariz göstəricisidir. Bizim vəzifəmiz bu ümidi qorumaq və gücləndirmək, gənclərimizə keyfiyyətli təhsil verməklə gələcəyə düzgün cavab verməkdir”.
"Əlçatan ali təhsil bərabərlik üçün güclü bir fürsət təqdim edir"
E.Özvar Türkiyə ali təhsil sisteminin ən güclü aspektlərindən birinin "əlçatanlıq" olduğunu bildirib və əlavə edib ki, Türkiyə daxilində yayılmış universitetlər və etibarlı, mərkəzləşdirilmiş imtahanlar vasitəsilə aparılan yerləşdirmə sistemi gənclərə bərabərlik üçün güclü bir fürsət təqdim edir.
"Ali təhsilə çıxışı sadəcə universitet qapılarından keçmək kimi görmürük", - deyən E.Özvar əlavə edib: "Gənclərimizin keyfiyyətli təhsil almalarını, müasir dövrdə lazım olan bacarıqlara yiyələnmələrini və məzun olduqdan sonra məhsuldar gələcəyə hazırlaşmalarını hədəfləyirik. Universitetlərimizə göstərilən etimadı qorumaq və bu etimadı daha yüksək keyfiyyət, daha güclü tədqiqat və daha böyük məşğulluq imkanları ilə qarşılamaq üçün çalışmağa davam edəcəyik".
"Türkiyə həm də beynəlxalq tələbələr üçün güclü bir cazibə mərkəzidir"
YÖK sədri Türkiyə universitetlərinə marağın yalnız Türkiyə vətəndaşları ilə məhdudlaşmadığını vurğulayaraq bildirib ki, “OECD ölkələrinə gedən yeni beynəlxalq tələbələrin sayının 13 faiz azaldığı bir vaxtda Türkiyənin cəlbediciliyini qoruması da vacibdir. Universitetlərimizin akademik tutumu, mədəni zənginliyimiz və təhlükəsiz və əlçatan təhsil mühitimiz Türkiyəni beynəlxalq tələbələr üçün güclü bir seçim məkanına çevirir”.
Dünya üzrə ali təhsil yeni bir dövrə qədəm qoyur
Onun sözlərinə görə, dünyanın bir çox ölkəsində universitetlər tələbə sayının azalması, artan xərclər və beynəlxalq tələbə qəbulunun azalması ilə mübarizə aparırlar.
ABŞ-da bakalavr tələbələrinin sayı 2010-2021-ci illər arasında 15 faiz azalıb və son illərdə məhdud bərpa olunmasına baxmayaraq, tələbə sayı uzunmüddətli pik səviyyəsindən aşağıda qalır.
OECD məlumatlarına görə, 2024-cü ildə üzv ölkələrə gələn yeni beynəlxalq ali təhsil tələbələrinin sayı əvvəlki illə müqayisədə 13 faiz azalaraq 1,8 milyona düşüb. Bu azalma Kanadada 39 faiz, Avstraliyada 22 faiz, Böyük Britaniyada 14 faiz və ABŞ-da 12 faiz təşkil edib.
Bu vəziyyətlə qarşılaşan bir çox ölkə universitetlərini yenidən qurur. Bəzən ictimaiyyət arasında "super universitetlər" və ya "çempion universitetlər" adlandırılan birləşmələr vasitəsilə məqsəd tədqiqat potensialını, beynəlxalq görünürlüyü və maliyyə dayanıqlığını gücləndirməkdir.
