Uşaqları kibertəhdidlərdən qorumaq üçün mobil tətbiq hazırlanır
Avropa Komissiyası internet mühitində uşaqların və yeniyetmələrin daha effektiv qorunması məqsədini daşıyan yeni fəaliyyət planı açıqlayıb.
"Azərbaycan müəllimi" xəbər verir ki, fəaliyyət planının əsas məqsədi kibertəzyiq və onlayn təqiblə mübarizəni gücləndirmək, zərərçəkənlərə dəstək mexanizmlərini genişləndirmək və profilaktik tədbirləri artırmaqdır.
Planın mərkəzində Avropa İttifaqı (Aİ) miqyasında istifadəyə veriləcək mobil tətbiq dayanır. Bu tətbiq vasitəsilə uşaqlar və yeniyetmələr kibertəzyiq halları barədə milli yardım xətlərinə müraciət edə, psixoloji və məsləhət dəstəyi ala, həmçinin sübutları təhlükəsiz şəkildə saxlayıb təqdim edə biləcəklər. Komissiya tətbiqin baza modelini hazırlayacaq, üzv ölkələr isə onu uyğunlaşdıracaq, tərcümə edəcək və milli xidmətlərlə inteqrasiya edəcəklər.
Fəaliyyət planı üzv dövlətlər arasında koordinasiyanın gücləndirilməsini də nəzərdə tutur. Avropa Komissiyası ölkələri kibertəzyiqə qarşı milli strategiyalar hazırlamağa və məlumatların toplanması üçün vahid yanaşmadan istifadə etməyə çağırır.
Sənədin digər vacib istiqaməti profilaktikadır. Komissiya erkən yaşlardan etibarən sağlam və məsuliyyətli rəqəmsal davranışın təşviqini, müəllimlərin və məktəblərin bu sahədə resurs və təlim imkanlarının genişləndirilməsini planlaşdırır.
Komissiya planın icrası üçün üzv dövlətlər, sənaye nümayəndələri, vətəndaş cəmiyyəti institutları, beynəlxalq təşkilatlar və gənclərlə əməkdaşlığa başlayacaq. Təşəbbüsün məqsədi onlayn məkanı daha təhlükəsiz etmək və uşaqların rifahını qorumaqdır.
Statistikaya görə, Aİ-də 11–15 yaş arası hər altı uşaqdan biri kibertəzyiq qurbanı olduğunu bildirir. Sorğular Avropa vətəndaşlarının böyük əksəriyyətinin uşaqların onlayn qorunması üçün təxirəsalınmaz addımları zəruri hesab etdiyini göstərir.
