Xaçmazın İstisu qəsəbə məktəbində istilik problemi aradan qaldırılıb
Quba-Xaçmaz Regional Təhsil İdarəsinin tabeliyində fəaliyyət göstərən Xaçmaz rayonunun İstisu qəsəbə tam orta ümumtəhsil məktəbində istilik təminatında yaranmış problem aradan qaldırılıb.
Bu barədə "Azərbaycan müəllimi"nə Quba-Xaçmaz Regional Təhsil İdarəsindən məlumat verilib.
Bildirilib ki, məktəbin qazla təminatında yaranan problemlərlə əlaqədar Quba-Xaçmaz Regional Təhsil İdarəsi tərəfindən müvəqqəti olaraq dizel yanacağı ilə təminat təşkil edilib və bu yanaşma ilə problem həll olunana qədər istilik təminatı təmin olunub.
25 fevral 2025-ci il tarixindən etibarən məktəbin qazla təmin olunmasına başlanılıb. İdarə əməkdaşları tərəfindən məktəbdə görülən işlərə daimi nəzarət həyata keçirilir.
Qeyd olunub ki, təhsil müəssisələrində təlim-tədris prosesinin fasiləsizliyinin təmin edilməsi, eləcə də uşaqların sağlam və təhlükəsiz mühitdə təhsil alması prioritet istiqamətlərdəndir.
Bu baxımdan, payız-qış mövsümündə təhsil müəssisələrinin istiliklə təchizatının təmin edilməsi xüsusi əhəmiyyət kəsb edir. İstilik təminatının plana və qanunvericiliyə uyğun müddətdə həyata keçirilməsi, uşaqların istiliklə təchiz edilmiş təhsil müəssisələrində təlim-tədrisə cəlb olunmaları və tədrisin fasiləsizliyinin təmin edilməsi məqsədilə aidiyyəti qurumlarla birgə hazırlıq işləri həyata keçirilib.
