Akademik Yusif Məmmədəliyevin 120 illiyinə həsr olunmuş tədbir keçirilib
Dekabrın 24-də Abşeron-Xızı Regional Mədəniyyət İdarəsinə tabe Sumqayıt şəhər Heydər Əliyev Mərkəzi və Sumqayıt şəhər Yusif Məmmədəliyev adına 31 nömrəli tam orta ümumtəhsil məktəbinin birgə təşkilatçılığı ilə görkəmli alim, akademik Yusif Məmmədəliyevin anadan olmasının 120 illiyinə həsr olunmuş “Bir həyatın kimyası” adlı elmi-ədəbi tədbir təşkil edilib.
"Azərbaycan müəllimi" xəbər verir ki, tədbirdə Milli Məclisin deputatı Mehriban Vəliyeva, Sumqayıt Şəhər Bələdiyyəsinin sədri Adil Xudatov, Sumqayıt Şəhər İcra Hakimiyyətinin məsul əməkdaşı Fərman Kazımov, Abşeron-Xızı Regional Təhsil İdarəsinin Sumqayıt şəhər üzrə təhsil sektorunun müdiri İman Ağayev, eləcə də məktəbin şəhid məzunu Rüfət Əhmədovun anası Ruhiyyə Əhmədova iştirak ediblər.
Tədbir çərçivəsində akademikin elmi irsi, elmi məktəbin formalaşmasındakı rolu və müasir elmin inkişafına verdiyi töhfələr barədə çıxışlar edilib, şagirdlərin hazırladığı təqdimatlar və bədii kompozisiyalar nümayiş etdirilib.
Qeyd edək ki, tədbir ölkə Prezidenti, Müzəffər Ali Baş Komandan cənab İlham Əliyevin doğum gününə təsadüf etdiyindən, bu münasibətlə şagirdlər tərəfindən müxtəlif çıxışlar və videoçarxlar da təqdim olunub.
Tədbirin sonunda iştirakçı şagirdlər Sumqayıt Şəhər Bələdiyyəsi tərəfindən hədiyyələrlə təltif edilib, xatirə şəkilləri çəkilib.
