Mask 1 milyon ədəd insanabənzər robot istehsal etməyi planlaşdırır
“Tesla” “Model S” və “Model X” avtomobillərinin istehsalını dayandıraraq Kaliforniyadakı “Fremont” zavodunu insanabənzər robot istehsal xəttinə çevirir.
“Azərbaycan müəllimi” xarici KİV-ə istinadən xəbər verir ki, şirkət dörd ay ərzində zavodu tam şəkildə robot istehsalına uyğunlaşdırmağı və ilkin mərhələdə ildə 1 milyon insanabənzər robot istehsal etməyi planlaşdırır.
Məlumata görə, “Tesla”nın insanabənzər robot layihəsi artıq eksperimental mərhələdən kütləvi istehsal mərhələsinə keçir. Şirkət 2026-cı il üçün investisiya büdcəsini 25 milyard dollardan çox artırıb.
Şirkət insanabənzər robotları “ağıllı avtomobilin insanabənzər forması” kimi qiymətləndirir. Robotlarda istifadə edilən batareya, mühərrik və süni intellekt sistemlərinin böyük hissəsi elektrik avtomobillərindəki texnologiyalar əsasında hazırlanıb.
“Tesla” bildirir ki, robotların hərəkət, balans və ətraf mühiti analiz etmə bacarıqları “Full Self-Driving” texnologiyasının məlumat bazası ilə dəstəklənir.
Şirkətin üçüncü nəsil insanabənzər robotunu 2026-cı ildə təqdim etməsi və onu sənaye miqyasında istehsala çıxarması gözlənilir. Robotların əsasən zavodlar, evlər və səhiyyə sektorunda təkrarlanan və təhlükəli işləri yerinə yetirməsi planlaşdırılır.
“Tesla” rəhbəri İlon Mask uzunmüddətli perspektivdə dünyada insanabənzər robotlara tələbatın 10 milyard vahidə çata biləcəyini bildirib.
