Bu gün COP29 çərçivəsində “Maliyyə, investisiya və ticarət günü” təşkil edilib. COP29 Prezidenti, BMT və müxtəlif beynəlxalq qurumların təşkilatçılığı ilə müxtəlif iclaslar və tədbirlər həyata keçirilib.

“Azərbaycan müəllimi” xəbər verir ki, Azərbaycan Respublikası Dövlət Neft Fondu (ARDNF), Suveren Fondların Beynəlxalq Forumu (SFBF) ilə birgə COP29 çərçivəsində “Yaşıl enerji keçidinin maliyyələşdirilməsi istiqamətində qlobal suveren fondların rolu” mövzusunda panel sessiyada  tematik gündəmə uyğun olaraq müzakirələr aparılıb. 

Tədbirdə “Ithmar Capital” şirkətinin icraçı direktoru SFBF-nin sədri Obaid Amrane və ARDNF-nin icraçı direktoru SFBF-nin sədr müavini İsrafil Məmmədov, elm və təhsil nazirinin müavini Kənan Kərimzadə iştirak ediblər.

Çıxışçılar suveren sərvət fondlarının (SSF) iqlim dəyişikliyinin qarşısını almaqda uzunmüddətli investisiya strategiyaları ilə oynadığı əhəmiyyətli rola xüsusi diqqət çəkiblər.

Həmçinin bərpa olunan enerjinin artırılması və enerji səmərəliliyinin inkişafı üçün investisiyaların artırılması məsələsi müzakirə edilib.

İqlim dəyişikliyinə qarşı fəaliyyət və bu sahədə inkişaf üçün beynəlxalq əməkdaşlığın təşviqinin mühüm olduğu vurğulanıb.

Tədbirin məqsədi iştirakçı ölkələrin və tərəfdaş təşkilatların iqlim dəyişikliyi ilə mübarizə aparmaq və ekoloji dayanıqlılığı təşviq etmək üçün ortaq səylərini birləşdirmək olub. Həmçinin qlobal liderləri bir araya gətirərək, SSF-lərin dayanıqlı maliyyənin inkişafına və aşağı karbonlu iqtisadiyyata keçid prosesinə dəstəyini, o cümlədən bu istiqamətdə fəaliyyətinin genişləndirilməsi məqsədi daşıyıb.

Müzakirələr panel sessiyalarla davam etdirilib.