"İqlim dəyişikliyi ilə mübarizədə ən güclü yanaşma yeni məlumatlara əsaslanan qərarlar qəbul etməkdir. Bu yeniliklər yalnız təbiətin bərpası ilə bağlı anlayışları deyil, həm də davamlı inkişafa töhfə verəcək".

"Azərbaycan müəllimi" xəbər verir ki, bunu Heydər Əliyev Fondunun vitse-prezidenti, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin təsisçisi və rəhbəri Leyla Əliyeva COP29 çərçivəsində "İqlim dayanıqlılığı üçün təhsilə investisiya: Erkən inkişafın və ekoloji savadlılığın gücləndirilməsi" mövzusunda təşkil olunan paneldə söyləyib.

Leyla Əliyeva iqlim dəyişikliyi ilə bağlı qlobal problemlərə xüsusi diqqət yetirilməli olduğunu bildirib:

"Biz Qafqazda da iqlim dəyişikliyinin təsirlərini müşahidə edirik. Buna görə də tullantıların təmizlənməsi, təbiətin qorunması və təhdid altındakı növlərin müəyyən edilməsi istiqamətində genişmiqyaslı işlər görülür.

İnsanların təbiətlə birbaşa ünsiyyət qurması onların təbiəti qorumağa cəlb edilməsinin ən yaxşı yoludur.

Eyni zamanda iqlim dəyişikliyi ilə mübarizədə texnologiya və dillərin inteqrasiyası olduqca vacibdir. Parkların, qoruqların və digər təbiəti mühafizə zonalarının düzgün idarə olunması və təbii sərvətlərin qorunması üçün yeni yanaşmaların tətbiq edilməsi zəruridir.

İqlim dəyişikliliyi digər sahələrlə yanaşı, enerji və onun səmərəliliyinə birbaşa təsir edir. İnanıram ki, COP29 bu fəaliyyət ətrafında dönüş nöqtəsi ola biləcək", - deyə Leyla Əliyeva bildirib.