Türkiyədə yeni tədris proqramına iqlim dəyişikliyi, ətraf mühit və davamlı inkişaf mövzularının daxil edilib. Bu dərslər vasitəsilə şagirdlərdə həm ekoloji problemlər haqqında məlumatlılıq yaratmaq, həm də bu sahədə innovativ həllər hazırlamaq qabiliyyətini inkişaf etdirmək məqsədilə mühüm addımlar atılır".

"Azərbaycan müəllimi" xəbər verir ki, bunu Türkiyənin təhsil naziri Yusuf Tekin Bakıda COP29 çərçivəsində "İnsan inkişafı və iqlim dayanıqlılığı üçün yaşıl təhsil mövzusunda nazirliklərarası dəyirmi masa - Yaşıl təhsil tərəfdaşlığı'nın 2-ci illik toplantısı"nda çıxışı zamanı bildirib.

Təhsil proqramımızda ətraf mühit təhsili, iqlim dəyişikliyi, yaşıl texnologiyalar, innovativ həllər və yaşıl iqtisadiyyat mövzuları əsas yer tutur.

Bundan əlavə, 6 fevral 2023-cü ildə ölkəmizin yaşadığı təbii fəlakətləri nəzərə alaraq, müasir dövrün çağırışlarına cavab verən bir model hazırlamaq qərarına gəldik. Tədris proqramımıza "Fəlakət idarəetməsi və ictimai dayanıqlıq" başlığı altında fəlakət təhsili, yerli biliklərin artırılması, fəlakətlərin qarşısının alınması və dayanıqlı inkişaf mövzularını əlavə etdik," – deyə nazir vurğulayıb.

Nazir həmçinin qeyd edib ki, proqramda, xüsusilə, qadın və uşaqların rolunu artırmaq, onları iqlim dayanıqlığı prosesinə daha fəal şəkildə cəlb etmək üçün xüsusi strategiyalar hazırlanır. Bununla yanaşı, yaşıl iqtisadiyyata keçidi dəstəkləyən təhsil strategiyaları, ekoloji sektorlarda işçi qüvvəsinin bacarıqlarını artırmaq və rəqəmsal transformasiya mövzuları üzərində də iş aparılır.

Yusuf Tekin bu istiqamətdə beynəlxalq qurumlarla, o cümlədən BMT, UNICEF, Dünya Bankı və UNESCO ilə birgə layihələrin həyata keçirildiyini bildirib:

"Bu kimi təşəbbüslər gələcək nəsillərə daha yaxşı bir dünya miras qoymaq baxımından çox vacibdir", - deyə türkiyəli nazir əlavə edib.