Azərbaycan Memarlıq və İnşaat Universiteti (AzMİU) və Təhsildə Keyfiyyət Təminatı Agentliyinin (TKTA) nümayəndələri arasında məhsuldar görüş keçirilib.

Universitetdən “Azərbaycan müəllimi”nə bildirilib ki, görüşdə AzMİU-nun tədris işləri üzrə prorektoru professor Akif Qasımov, TKTA-nın Təlim və metodologiya şöbəsinin rəhbəri Elçin Cəfərov və hər iki qurumun nümayəndələri iştirak ediblər. Görüşün məqsədi tədris prosesinin keyfiyyətinin artırılması, akademik məsləhətçilərin müasir tələblərə uyğun təlimatlandırılması və onların TKTA tərəfindən sertifikatlaşdırılması məsələlərinin müzakirəsi olub.

Tədris işləri üzrə prorektor Akif Qasımov tyutor xidmətinin universitetin tədris prosesindəki əhəmiyyətini vurğulayıb və bu xidmətin keyfiyyətinin yüksəldilməsi üçün mütəmadi təlimlərin təşkilinin vacibliyini qeyd edib. O bildirib ki, bu istiqamətdə həyata keçiriləcək tədbirlər tədrisin effektivliyinə müsbət təsir edəcək.

TKTA-nın Təlim və metodologiya şöbəsinin rəhbəri Elçin Cəfərov AzMİU-nun bu təşəbbüsünü yüksək qiymətləndirərək bu təcrübənin digər ali təhsil müəssisələri üçün də nümunə ola biləcəyinə ümid etdiyini bildirib. O əlavə edib ki, AzMİU ilə birgə həyata keçiriləcək təlimlər universitetlərdə tələbəyönümlü təhsil və kredit transfer sisteminin inkişaf etdirilməsinə töhfə verəcək. Sonda təhsil qanunvericiliyi, tələbəyönümlü təhsil yanaşmaları və kredit transfer sistemi ilə bağlı təlimlərin başlanmasına dair qərar qəbul edilib. Bu əməkdaşlığın gələcəkdə tədris keyfiyyətinin artırılmasına geniş imkanlar yaradacağı vurğulanıb.