Əmək münasibətlərində işçi və işəgötürən arasında qarşılıqlı öhdəliklərin yerinə yetirilməsi vacibdir. Lakin bəzi hallarda işçinin əmək funksiyalarını kobud şəkildə pozması qanunvericiliyə əsasən müəyyən nəticələr doğurur. 

 “Azərbaycan müəllimi” xəbər verir ki, Əmək Məcəlləsinin 72-ci maddəsinə əsasən, aşağıdakı hallar işçi tərəfindən əmək vəzifələrinin kobud şəkildə pozulması hesab edilir:

- özünün xəstəliyi, yaxın qohumunun xəstələnməsi və ya vəfat etməsi istisna olunmaqla heç bir üzrlü səbəb olmadan bütün iş günü işə gəlməməsi;
- alkoqollu içkilər, narkotik vasitələr və psixotrop, toksik və digər zəhərli maddələr qəbul edərək sərxoş vəziyyətdə işə gəlməsi, habelə işə gəldikdən sonra iş yerində həmin içkiləri və ya maddələri qəbul edərək sərxoş vəziyyətdə olması;
- təqsirli hərəkətləri (hərəkətsizliyi) nəticəsində mülkiyyətçiyə maddi ziyan vurması;
- təqsirli hərəkətləri (hərəkətsizliyi) nəticəsində əməyin mühafizəsi qaydalarını pozaraq iş yoldaşlarının səhhətinə xəsarət yetirməsi və ya onların bu səbəbdən həlak olması;
- qəsdən istehsal, kommersiya və ya dövlət sirrinin yayılması və ya bu sirrin gizli saxlanılması üzrə öhdəliklərini yerinə yetirməməsi;
- əmək fəaliyyəti zamanı yol verdiyi kobud səhvləri, hüquq pozuntuları nəticəsində işəgötürənin, müəssisənin və ya mülkiyyətçinin qanuni mənafeyinə ciddi xələl gətirməsi;
- əmək funksiyasını pozduğuna görə əvvəllər işəgötürən tərəfindən verilmiş intizam tənbehindən nəticə çıxarmayaraq altı ay ərzində təkrarən əmək funksiyasını pozması;
- iş vaxtı ərzində bilavasitə iş yerində inzibati xətalara və ya cinayət tərkibi olan ictimai-təhlükəli əməllərə yol verməsi.

Beləliklə, işçinin əmək funksiyalarını kobud şəkildə pozması yalnız əmək müqaviləsinin ləğvinə səbəb olmaqla məhdudlaşmır, həm də işçi və işəgötürən arasında etibarın itməsinə, iş yerində əmək intizamının pozulmasına və müəssisənin fəaliyyətinə mənfi təsir göstərə bilər. Bu səbəbdən hər iki tərəfin qanunvericiliyə riayət etməsi və qarşılıqlı öhdəliklərini vicdanla yerinə yetirməsi mühüm əhəmiyyət kəsb edir.