"Elm elə bir sahədir ki, onu nə bir təbəqəyə, nə bir şəxsin adına, nə də bir universitet və ya milli çərçivəyə aid etmək olar".

"Azərbaycan müəllimi" xəbər verir ki, bunu elm və təhsil naziri Emin Əmrullayev Türkiyənin İstanbul şəhərində keçirilən “Qlobal Dayanıqlı İnkişaf Konqresi”nin rəsmi açılışı çərçivəsində Azərbaycan təcrübəsinə həsr olunmuş müzakirə zamanı deyib.

Nazir elmin inkişafı üçün əməkdaşlıq və bilik paylaşımının vacibliyini vurğulayıb.

Azərbaycanın tədbirdə böyük nümayəndə heyəti ilə təmsil olunan ölkələrdən biri olduğunu deyən Emin Əmrullayev gələcək əməkdaşlıqları müzakirə etməyə hazır olduğunu söyləyib.

"Burada olan hər kəsin əməkdaşlıq və paylaşım prinsiplərinə inandığını düşünürəm. Hesab edirəm ki, buradakı hər kəs qarşılıqlı fayda üçün əməkdaşlığa açıqdır. Çünki elmi əməkdaşlıq olmadan inkişaf mümkün deyil”, – deyə nazir əlavə edib.

Emin Əmrullayev davamlı inkişaf, “yaşıl təhsil” anlayışı və ətraf mühitlə bağlı ictimai səviyyədə baş verən hadisələrin elmi təhlili üçün məlumatların toplanılmasının əhəmiyyətini qeyd edib. O, Bakıdakı universitetlərin bu istiqamətdə fəal iştirak etdiyini və bugünkü müzakirələrdə universitetlərin davamlılıq məsələsinə yanaşması və innovasiya imkanları ilə bağlı yeni ideyaların formalaşacağına ümidvar olduğunu söyləyib:

"Azərbaycanın bu sammitdə yüksək səviyyədə təmsil olunması sevindiricidir. Sərgi məkanında da ölkəmiz layiqincə təqdim olunur”.