"Süni intellektin sürətli inkişafı ali təhsilin ənənəvi modelini kölgədə qoyur".

"Azərbaycan müəllimi" xəbər verir ki, bu sözləri “The Regional Nexus” mövzusunda təşkil olunan “Baku ID” innovasiya festivalında Dördüncü Sənaye İnqilabının Təhlili və Koordinasiya Mərkəzinin (4SİM) icraçı direktoru Fariz Cəfərov deyib.

Onun sözlərinə görə, süni intellekt artıq təkcə sənaye və kənd təsərrüfatında deyil, təhsil sektorunda da köklü dəyişikliklərə səbəb olur:

“Müəllimlər kurikulum və imtahan suallarının hazırlanmasında, tələbələr isə diplom işlərinin tərtibində süni intellektdən istifadə edirlər. Bu isə universitetlər qarşısında plagiat və akademik dürüstlük məsələləri ilə bağlı yeni çağırışlar yaradır”.

Fariz Cəfərov qeyd edib ki, süni intellektin həyatımıza sürətli inteqrasiyası təhsildə də çevikliyə ehtiyac yaradır:

“Ənənəvi kurikulumların hazırlanması 2-3 il, dəyişməsi isə 5-10 il vaxt aparır. Halbuki texnologiyalar aylar içində dəyişir. Buna görə də gələcəkdə dördillik nəzəri proqramlar deyil, daha çox qısamüddətli, praktiki bacarıq yönümlü mikrokvalifikasiyalar əsas olmalıdır. Çünki biz bu günün deyil, sabahın tələbələri üçün təhsil veririk”.

O əlavə edib ki, sənayenin real tələbləri nəzərə alınmadan tərtib olunan təhsil proqramları aktual olmayacaq:

“Biz hər il 200 tələbəni real verilənlər üzərində təcrübəyə cəlb edirik. Onlar müxtəlif AI proqramları ilə işləməyi öyrənirlər. Gələcəyin universitetləri məhz bu cür praktika yönümlü təhsil modellərinə keçməlidirlər”.