İordaniyanın Al əl-Beyt Universitetində “Azərbaycan Mədəniyyəti Günü” və “Azərbaycana pəncərə” adlı elmi simpozium təşkil olunub.

“Azərbaycan müəllimi” AZƏRTAC-a istinadən xəbər verir ki, Azərbaycan Respublikasının İordaniya Haşimilər Krallığındakı səfirliyinin və Al əl-Beyt Universitetinin birgə təşkilatçılığı ilə keçirilən tədbirdə təhsil ocağının akademik və müəllim heyəti, tələbələr, İordaniya-Azərbaycan Dostluq Cəmiyyətinin üzvləri, eləcə də Naxçıvan Dövlət Universitetinin rektoru Elbrus İsayevin rəhbərlik etdiyi nümayəndə heyəti iştirak edib.

İordaniya ilə Azərbaycan arasında dostluq və mədəni əlaqələrin inkişaf etdirilməsi, qarşılıqlı anlaşma və yaxınlaşma körpülərinin möhkəmləndirilməsi, həmçinin Azərbaycan xalqının zəngin tarixi və mədəni irsinin tanıdılması məqsədilə təşkil olunmuş tədbirin ilk hissəsində Naxçıvan Dövlət Universitetinin rəqs kollektivi tərəfindən milli rəqslər nümayiş olunub, ölkəmizin mədəniyyəti və turizm potensialı ilə bağlı təqdimat xarakterli videoçarxlar iştirakçıların diqqətinə çatdırılıb.

Daha sonra Al əl-Beyt Universitetinin rektoru Usamə Nasir, Azərbaycan Respublikasının İordaniya Haşimilər Krallığındakı səfiri Eldar Səlimov, Naxçıvan Dövlət Universitetinin rektoru Elbrus İsayev, İordaniya-Azərbaycan Dostluq Cəmiyyətinin üzvü, Bəni Ubeyd Bələdiyyəsinin sədri Camal Əbu Ubeyd, habelə universitetin İncəsənət və humanitar elmlər fakültəsinin dekanı Səid Əbu Xader çıxış ediblər. Çıxışlar zamanı iki ölkə arasında mövcud olan dostluq və tərəfdaşlıq münasibətləri, xüsusilə də mədəni əməkdaşlıq istiqamətləri barədə ətraflı məlumat verilib, bu əlaqələrin daha da inkişafının vacibliyi qeyd olunub və bu məqsədlə birgə səylərin davam etdirilməsinin əhəmiyyəti vurğulanıb.

Çıxışların ardınca “Azərbaycana pəncərə” adlı elmi simpozium keçirilib. Simpoziumda iordaniyalı tədqiqatçılar və ölkəmizin Krallıqdakı səfirliyinin əməkdaşı tərəfindən “Azərbaycan ədəbi mətnlərinin Avropaya köçü: şair Mirzə Şəfi Vazehin yaradıcılığı”, “Azərbaycan mədəniyyəti və onun müxtəlifliyi”, “İordaniya-Azərbaycan siyasi və iqtisadi əlaqələri”, “Azərbaycanda İslamın yayılması və Ərəb xilafətinin mövcudluğu”, “Azərbaycan şairlərinin İslam sivilizasiyasının zənginləşməsindəki rolu” və “Azərbaycan Respublikasının coğrafi mövqeyi və insan resursları” mövzuları üzrə mühazirələr oxunub.

Simpoziumun sonunda məruzəçilərə Al əl-Beyt Universitetinin rektoru, Azərbaycan Respublikasının İordaniya Haşimilər Krallığındakı səfiri və Naxçıvan Dövlət Universitetinin rektoru tərəfindən təşəkkürnamələr təqdim edilib.