"Yaşıl təhsil layihələrinin işləyib-işləmədiyini, effektivliyini anlamaq üçün bu prosesdə ictimai səviyyədə iştirak və real məlumatların toplanılması vacibdir”.

"Azərbaycan müəllimi" xəbər verir ki, bunu elm və təhsil naziri Emin Əmrullayev Türkiyənin İstanbul şəhərində keçirilən “Qlobal Dayanıqlı İnkişaf Konqresi”nın rəsmi açılışı çərçivəsində Azərbaycan təcrübəsinə həsr olunmuş müzakirə zamanı deyib.

Onun sözlərinə görə, ətraf mühitlə bağlı maarifləndirmə, cəmiyyətin fəallığı və elmi əsaslı məlumatların toplanması bu sahədə irəliləyişin təməlini təşkil edir.

Emin Əmrullayev universitetlərin yalnız layihələr deyil, real nəticələr göstərmək və Dayanıqlı İnkişaf Məqsədləri istiqamətində konkret öhdəliklər götürməli olduğunu bildirib. 

O, tələbələrin də bu prosesə cəlbinin vacibliyini vurğulayıb: “Gənclərin liderlik bacarıqları, hüquq və məsuliyyət anlayışları hələ erkən yaşlardan formalaşdırılmalıdır. Tələbələr davamlı inkişaf hərəkatının fəal üzvünə çevrilməlidirlər. Bundan başqa, universitetlər üçün davamlılığın ölçülə biləcəyi çərçivələrin yaradılması vacibdir. Məlumatların toplanması isə bu prosesi daha şəffaf və məqsədyönlü edir".

Nazir dayanıqlı inkişaf sahəsində istifadə olunan anlayışların tez-tez işlədildiyini, lakin bu sahədə fundamental elmi-tədqiqatların hələ də çatışmadığını deyib:

“Biz "dayanıqlılıq", "yaşıl təhsil" kimi anlayışları tez-tez işlədirik. Amma sual budur: bu anlayışların arxasında əsaslı elmi-tədqiqatlar varmı? Nazirlik olaraq bizim məqsədimiz universitetlərdə bu cür fundamental istiqamətləri dəstəkləmək və uzunmüddətli perspektivdə real nəticələrə yol açmaqdır”.