Yüksək Texnologiyalar Parkı və aparıcı ali təhsil müəssisələri arasında "SABAH.city" layihəsi çərçivəsində əməkdaşlığa dair Anlaşma Sazişi imzalanıb.

"Azərbaycan müəllimi" xəbər verir ki, sazişə əsasən, Bakı Dövlət Universiteti, Azərbaycan Texniki Universiteti və Azərbaycan Dövlət Neft və Sənaye Universitetinin İT, mühəndislik və elm istiqamətləri üzrə seçilmiş SABAH qruplarının proqramları 2026-cı ildən etibarən YTP ərazisində yaradılacaq “SABAH.city” şəhərciyində tədris olunacaq.

Tədbirin açılışında çıxış edən Elm və Ali Təhsil üzrə Dövlət Agentliyinin direktoru Ülkər Səttarova bu əməkdaşlığın biznes mühiti ilə elm və ali təhsil arasında yeni körpü quracağını vurğulayıb. 

Daha sonra ali təhsil müəssisələrinin rektorları layihənin əhəmiyyəti barədə fikirlərini bölüşüblər.

Yüksək Texnologiyalar Parkının baş direktoru Nihat Məcidov layihə haqqında geniş təqdimat edərək bildirib ki, “SABAH.city” şəhərciyində startaplar üçün məkanlar, tədqiqat və inkişaf laboratoriyaları, tədris sahələri, ictimai zonalar və idman mərkəzlərinin yaradılması nəzərdə tutulur. Bu yanaşma müxtəlif sahələrin inteqrasiyasını təmin edəcək və dayanıqlı ekosistemin formalaşmasına imkan yaradacaq.

Qeyd edək ki, bakalavr və magistrləri əhatə edən bu təşəbbüs tədqiqat və innovasiya yönümlü akademik mühitin inkişafına, iştirakçı universitetlərdə qabaqcıl akademik ekosistemin qurulmasına və tələbələrin daim yenilənən əmək bazarına hazırlığına töhfə verməyi hədəfləyir.