Amerikalı alimlər süni intellekt əsasında yeni texnologiya hazırlayıblar.

“Azərbaycan müəllimi” “Oxford Academic” jurnalına istinadən xəbər verir ki, bu texnologiya insanın ürək ritm pozğunluğu, yəni qulaqcıq fibrilyasiyası riskini müəyyən etməyə imkan verir və vaxtında tədbir görməyə şərait yaradır.

Bu yeni sistem elektron tibbi kartlardakı məlumatları süni intellektlə analiz edir. Alqoritm yaş, boy, çəki, ürək, böyrək xəstəlikləri, şəkərli diabet və zərərli vərdişlər (məsələn, siqaret və ya spirt istifadəsi) kimi göstəriciləri nəzərə alır. Əgər risk həddən artıq olarsa, sistem həkimi xəbərdar edir və əlavə müayinələr təklif edir.

Texnologiya ABŞ-də böyük bir klinikada sınaqdan keçirilib və kardiologiya bölməsinə inteqrasiya olunub. Həkimlər sistemin istifadəsinin asan və gündəlik praktikaya uyğun olduğunu bildiriblər.

Qulaqcıq fibrilyasiyası böyüklərdə ən çox rast gəlinən və təhlükəli aritmiya növlərindən biridir. Uzun müddət əlamətsiz keçsə də, tromb əmələ gəlməsi və insult kimi ağır fəsadlara səbəb ola bilər. Qulaqcıq fibrilyasiyası zamanı ürək ritmsiz və xaotik döyünür. Bu, qan dövranının pozulmasına, tromb əmələ gəlməsinə və onların digər orqanlara keçərək infarkt və insult kimi hallara səbəb olmasına yol açır. Bu aritmiya ürək çatışmazlığı riskini 3 dəfə, insult riskini 5 dəfə, ölüm riskini isə 1.5–3.5 dəfə artırır. Bu səbəbdən xəstəlik ciddi əlillik və ölüm hallarının əsas səbəblərindən biridir.

Mütəxəssislər qeyd edirlər ki, xəstəliyin riskini vaxtında müəyyənləşdirmək və profilaktik tədbirlər görmək vacibdir. Ənənəvi dərman müalicəsi zamanla təsirini itirə bilər. Dərmanlar simptomları nəzarətdə saxlamağa kömək etsə də, problemi tam həll etmir.

Mütəxəssislər süni intellektin bu sahədə böyük perspektivlər açdığını vurğulayırlar. Belə texnologiyalar həkimlərə yüksək risk qrupundakı pasiyentləri vaxtında aşkarlamağa və müvafiq müalicəyə başlamağa kömək edir. Gələcəkdə bu üsullar digər ciddi xəstəliklərin erkən aşkarlanmasında da istifadə oluna bilər.