Alimlər ölümcül ilanların: mambalar, dəniz ilanları və çınqıl ilanlarının zəhərlərinə qarşı süni intellektlə dəstəklənən antidotlar hazırladıqlarını bildiriblər.

“Azərbaycan müəllimi” xəbər verir ki, maşın öyrənməsi (Machine Learning (ML) - red.) orqanizmi ölümcül toksinlərdən qoruyan zülalların yaradılmasına kömək edib və bu, siçanlar üzərində aparılan sınaqlarla təsdiqlənib. 

Bu gün antidotlar heyvanlar immunizasiya edilərək mürəkkəb və bahalı üsulu ilə yaradılır. Atlar və onun kimi heyvanlara ilan zəhəri vurulur və antitellərin görünməsini gözləyirlər. Maşın öyrənməsi isə toksinləri zərərsizləşdirmək üçün zülalların sintezinə lazım olan vaxtı kökündən azaltmağı vəd edir. Bu da, təbii ki, daha ucuz və təhlükəsiz başa gələcək.

Tədqiqat Vaşinqton Universitetinin Tibb fakültəsi tərəfindən Kaliforniya Universitetinin Protein Mühəndisliyi Tibb İnstitutu və Danimarka Texniki Universitetinin həmkarları ilə birgə aparılıb. Universitet süni intellektin köməyi ilə hazırlanmış antidota görə patent almaq üçün müraciət edib.

Hər il ilan sancması problemindən 2 milyondan çox insan əziyyət çəkir. Ümumdünya Səhiyyə Təşkilatının məlumatına görə, onlardan 100 000-dən çoxu ölür, 300 000-i isə əzaların deformasiyası, amputasiya və ya digər ciddi fəsadlar yaşayır, hətta əlil olur.

Süni intellekt toksinlərlə qarşılıqlı əlaqədə olan və onları bağlayan, canlı orqanizm hüceyrələrinin reseptorlarına çatmasının qarşısını alan yeni zülallar yaratmağa kömək edir. 

Tədqiqatçılar antidotların hazırlanması üçün yeni yolların yaranmasından əlavə, kompüter dəstəkli dizayn üsullarının digər dərmanların hazırlanmasında istifadə oluna biləcəyinə inanırlar. Bu cür üsullardan tropiklərin ən yoxsul ölkələrində əziyyət çəkən, adətən pulu olmayan, diqqətdən kənarda qalan xəstəliklərin müalicəsi üçün də istifadə edilə bilər.