Uşaq və yeniyetmələrin yaradıcılıq potensialının dəstəklənməsi, həmçinin onların istedadının üzə çıxarılması məqsədilə təşkil edilən Uşaq İncəsənət Festivalı çərçivəsində seçmə turun ikinci mərhələsi davam edir.

“Azərbaycan müəllimi” xəbər verir ki, Azərbaycan Respublikasının Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin birgə həyata keçirdiyi Uşaq İncəsənət Festivalı layihəsi respublikamızın müxtəlif bölgələrindən olan istedadlı uşaqları birləşdirən genişmiqyaslı proqramdır. Bu platforma gənc istedadlara öz qabiliyyətini göstərmək, yaradıcılıq potensialını inkişaf etdirmək və peşəkar sahədə ilk addımlarını atmaq imkanı yaradır.

İkinci mərhələ çərçivəsində müxtəlif incəsənət sahələri üzrə həm həvəskarlar, həm də peşəkar iştirakçılar arasında seçim davam edir. Münsiflər heyəti iştirakçıların təkcə texniki hazırlığını deyil, həm də səhnə mədəniyyətini, bədii zövqünü və yaradıcı yanaşmasını qiymətləndirir.

Festivala qatılmaq üçün qeydiyyatdan keçmiş fərdi iştirakçıların ümumi sayı 21 559 nəfər olub. Onlardan 16 117 nəfəri birinci mərhələdə iştirak edib, 8 596 iştirakçı ikinci tura yüksəlib.

Kollektiv iştirakçılara gəlincə, qeydiyyatdan keçmiş qrupların ümumi sayı 294 olub. Onlardan 255-i seçimin birinci mərhələsində iştirak edib, 3032 iştirakçının daxil olduğu 215 qrup növbəti mərhələyə keçib.

Qeyd edilib ki, seçim turunun ikinci mərhələsi sentyabrın əvvəlinə qədər davam edəcək.

Festivalın bütün mərhələləri uşaqların yaradıcılıq potensialının dəstəklənməsinə və incəsənət ustalarının yeni nəslinin formalaşmasına mühüm töhfə verir.