Polis mayoru idi, indi kimya müəllimidir - Əli Abdullayevin maraqlı peşə yolu
Haqqında söz açacağımız Əli Abdullayev ilk fəaliyyətinə müəllimliklə başlasa da, sonradan polis orqanlarında uzun illər xidmət edir. Və illər sonra yenidən öz istəyi ilə təhsil sahəsinə qayıdaraq müəllimlik fəaliyyətini davam etdirməyə qərar verir.
"Azərbaycan müəllimi" bu dəfə oxucularını maraqlı həyat yolu olan kimya müəllimi Əli Abdullayevlə yaxından tanış edir.
Biləsuvar rayonunun Nərmankənd kəndində anadan olan Əli Abdullayev Şirin Heydərov adına Nərmankənd kənd tam orta məktəbini bitirib. Ali təhsilini Azərbaycan Dövlət Pedaqoji Universitetində “Kimya müəllimliyi” ixtisası üzrə alıb. 2014-cü ildə müəllimlərin işə qəbulu (MİQ) müsabiqəsində uğurlu nəticə göstərərək, Biləsuvar rayonu Çaylı kənd tam orta məktəbində kimya müəllimi fəaliyyətə başlayır. Sonradan həyat onu başqa bir məsuliyyətli peşəyə istiqamətləndirir. Belə ki, 2015-ci ildə Daxili İşlər Nazirliyinin orta rəis heyəti üzrə qəbul müsabiqəsində uğur qazanaraq polis leytenantı xüsusi rütbəsi alır və Neftçala Rayon Polis Şöbəsinin Yetkinlik yaşına çatmayanlarla profilaktik işin təşkili qrupunda inspektor vəzifəsinə təyin edilir.
Polis orqanlarında xidmət etdiyi illər ərzində peşəkarlığı və məsuliyyətli fəaliyyəti ilə seçilən Əli Abdullayev polis mayoru rütbəsinədək yüksəlib. Xidmətdə qazandığı uğurlara görə daxili işlər naziri tərəfindən təltif olunub.
Əli Abdullayev uzun illər hüquq-mühafizə orqanlarında xidmət etdikdən sonra yenidən təhsil sahəsinə qayıdır. 2025-ci ildə MİQ-də yenidən iştirak edərək 82,75 bal toplayır və Biləsuvar rayonu Nəsimi kənd tam orta məktəbində kimya müəllimi olaraq fəaliyyətə başlayır. Hazırda da həmin məktəbdə çalışır.
Əli müəllim hesab edir ki, şagirdlər kimyanı yalnız düsturlar və reaksiyalar toplusu kimi deyil, gündəlik həyatın ayrılmaz hissəsi kimi öyrənməlidirlər. Bu məqsədlə dərslərində real həyatdan nümunələr gətirir, müxtəlif təcrübələr nümayiş etdirir, əyani vəsaitlərdən və maraqlı suallardan istifadə edir. Onun fikrincə, ən böyük uğur şagirdlərin növbəti dərsi maraqla gözləməsidir.
Müasir tədris metodlarına üstünlük verən müəllim qrup işləri, problem əsaslı öyrənmə, beyin həmləsi, oyun elementləri, müzakirələr, animasiyalar, vizual təqdimatlar və rəqəmsal platformalardan geniş istifadə edir. Bu yanaşma şagirdlərin mövzunu daha dərindən mənimsəməsinə və əldə etdikləri bilikləri uzun müddət yadda saxlamasına kömək edir.
Gələcək planlarından danışan Əli Abdullayev bildirir ki, əsas məqsədi şagirdlərdə kimya elminə marağı artırmaq, onları uğurlu şagirdlər olaraq yetişdirməkdir.
Əli Abdullayevin həyat yolu göstərir ki, insan hansı peşəni seçməsindən asılı olmayaraq, əsas məqsədi cəmiyyətə fayda verməkdir. O, illərlə polis orqanlarında məsuliyyətlə xidmət edərək qanunun keşiyində dayanıb, bu gün isə yenidən müəllim kimi sinifdə doğma şagirdlərinin əhatəsindədir. O, kimya fənnini şagirdlərinə sevdirərək, onların elmə marağını artırmağa və gələcəyin savadlı, vətənpərvər gənclərinin yetişməsinə töhfə verməyə davam edir.
