Qəbələ Dövlət Peşə Təhsil Mərkəzində "Məzun günü" keçirilib
Qəbələ Dövlət Peşə Təhsil Mərkəzində 2025–2026-cı tədris ilinin başa çatması münasibətilə "Məzun günü" keçirilib.
"Azərbaycan müəllimi" xəbər verir ki, tədbirdə çıxış edən mərkəzin direktoru peşə təhsilinin əhəmiyyətindən danışıb, məzunları təbrik edərək onlara gələcək peşə fəaliyyətlərində uğurlar arzulayıb. Çıxış edən qonaqlar isə təhsil müəssisələri ilə işəgötürənlər arasında əməkdaşlığın rolundan bəhs edib, məzunlara xoş arzularını çatdırıblar.
Tədbir çərçivəsində uğurlu məzunların çıxışları dinlənilib. Məzunların təhsil müddətində qazandıqları bilik və bacarıqların onların məşğulluq imkanları əldə etməsinə, dəyişən əmək bazarında yer almasına yol açdığı bildirilmişdir.
Tədrisdə, istehsalat təlimində və nizam-intizamında fərqlənən məzunlar fəxri fərmanlarla təltif olunublar.
Qeyd edək ki, 2025–2026-cı tədris ili üzrə qəbul planına əsasən mərkəzə 773 tələbə qəbul olunub və ümumi qəbul planı 88.5% icra edilib. Hazırda mərkəzdə 40 ixtisas üzrə 993 tələbə təhsil alır. Cari tədris ilində 501 tələbə məzun olub.
Tədbir bədii proqramla davam edib. Musiqi və rəqs nömrələri bayram ovqatını daha da yüksəldərək məzunlara və qonaqlara xoş anlar yaşadıb.
