Region gənclərinin bacarıqlarının artırılması ilə bağlı layihə yekunlaşıb
Lənkəran şəhərində “Bir Könüllü” Tələbələrin Əməkdaşlığı İctimai Birliyinin təşkilatçılığı, Gənclər və İdman Nazirliyinin maliyyə dəstəyi, İnnovasiya və Rəqəmsal İnkişaf Agentliyi və SABAH.HUB-ın tərəfdaşlığı ilə həyata keçirilən “Ecopreneurship: Dayanıqlı gələcək üçün region gənclərinin bacarıqlarının artırılması” layihəsi uğurla yekunlaşıb.
“Azərbaycan müəllimi” xəbər verir ki, layihə Lənkəran, Cəlilabad və Astara bölgələrindən 30 gənci əhatə edib. Layihənin əsas məqsədi region gənclərini innovasiya ekosistemi ilə tanış etmək, sosial və ekoloji problemlərin həllində təşəbbüskarlıq göstərmələrini stimullaşdırmaq və innovativ həll yolları yaratmağa təşviq etmək olub. Bu çərçivədə iştirakçılara startap anlayışı, dayanıqlı sahibkarlıq, biznes modelin qurulması, maliyyə idarəetməsi, müştəri identifikasiyası üzrə təlimlər keçirilib. Eyni zamanda, ideyaların praktik tətbiq imkanlarının öyrənilməsi üçün tərəfdaş qurumları təmsil edən təcrübəli mütəxəssislərin iştirakı ilə mentorluq sessiyaları təşkil edilib.
Təqdim olunan ideyalar münsiflər heyəti tərəfindən problemi həll etmək potensialı, orijinallıq və dayanıqlılıq kimi kriteriyalar əsasında qiymətləndirilib və ən uğurlu ideyalar seçilib.
