Sinqapurda kitab oxuyanlara pul veriləcək
Sinqapurda insanları daha çox kitab oxumağa təşviq etmək məqsədilə yeni milli təşəbbüs həyata keçirilir.
"ReadSG" adlı beşillik proqram çərçivəsində iştirakçılar gündə ən azı 15 dəqiqə kitab oxuyaraq virtual sikkələr qazana və onları pula çevirə biləcəklər.
“Azərbaycan müəllimi” xəbər verir ki, təşəbbüs Sinqapur Milli Kitabxana Şurası (NLB) tərəfindən irəli sürülüb.
Proqramın əsas məqsədi oxumağı gündəlik vərdişə çevirmək və rəqəmsal mühitdə qısa məzmun istehlakının, o cümlədən davamlı oxu mədəniyyətini gücləndirməkdir.
Sistem necə işləyir?
İştirakçılar Sinqapur hökumətinin "CrowdTaskSG" platformasında gündəlik oxu sessiyalarını qeyd edə bilirlər. Ən azı 15 dəqiqəlik oxu sessiyasına görə 20 virtual sikkə əldə edilir. 1 000 sikkə isə 1 Sinqapur dollarına dəyişdirilə bilər. Buna görə iştirakçı 1 Sinqapur dolları qazanmaq üçün 50 belə oxu sessiyası keçirməlidir.
Proqramda gündə yalnız bir oxu sessiyasının hesablanmasına icazə verilir. Bu isə nəzəri olaraq 1 Sinqapur dolları qazanmaq üçün ən azı 50 gün ərzində hər gün 15 dəqiqə oxumaq deməkdir.
Maraqlıdır ki, bu təşəbbüs Sinqapur şagirdlərinin beynəlxalq oxu nəticələrində yüksək göstəricilər nümayiş etdirdiyi bir vaxtda başlayıb.
OECD-nin PISA 2025 nəticələrinə əsasən, Sinqapur 15 yaşlı şagirdlərin oxu üzrə orta nəticəsində 535 balla 89 iştirakçı sistem arasında birinci olub. Eyni zamanda, şagirdlərin 86%-i oxu üzrə ən azı 2-ci səviyyə bacarığına çatıb, 22%-i isə 5 və ya daha yüksək səviyyədə nəticə göstərib.
Beləliklə, "ReadSG" təşəbbüsü Sinqapurda oxu göstəricilərinin yüksək olmasına baxmayaraq, oxumağı gündəlik vərdiş kimi daha da gücləndirmək və rəqəmsal diqqət dağınıqlığına qarşı alternativ yaratmaq məqsədi daşıyır.
