Sumqayıt Musiqi Kollecində uşaq hüquqlarına dair maarifləndirmə tədbiri keçirilib
Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva tərəfindən elan olunmuş “Uşaq Hüquqları Aylığı” çərçivəsində Azərbaycan Milli Konservatoriyasının nəzdində Sumqayıt Musiqi Kollecində maarifləndirmə tədbiri keçirilib.
"Azərbaycan müəllimi" xəbər verir ki, bu barədə Ombudsman Aparatı məlumat yayıb.
Ombudsman Aparatının Uşaq hüquqlarının müdafiəsi sektorunun böyük məsləhətçisi Azər İsalı çıxış edərək Müvəkkilin uşaq hüquqlarının müdafiəsi sahəsində həyata keçirdiyi fəaliyyət, bu istiqamətdə görülən işlər və mövcud müdafiə mexanizmləri barədə geniş məlumat verib.
Tədbir zamanı, həmçinin yetkinlik yaşına çatmayanlar tərəfindən törədilən hüquq pozuntuları, bu əməllərin doğurduğu hüquqi nəticələr, rəqəmsal mühitdə uşaqların üzləşə biləcəkləri təhlükə və risklər, eləcə də hüquq pozuntularının və digər riskli halların qarşısının alınması istiqamətində səmərəli preventiv yanaşmalar barədə məlumat verilib. Tədbirdən kollecin 100-dən çox tələbəsi faydalanıb.
Yekunda iştirakçıları maraqlandıran suallar ətraflı şəkildə cavablandırılıb.
