Azərbaycan üçün proqramlar təklif edəcəyik – IE Universitetinin prezidenti
"Hər bir cəmiyyətdə gəncləri, eləcə də müxtəlif nəsilləri dövrümüzün irəli sürdüyü çox mürəkkəb tələblərin öhdəsindən gələ bilmələri üçün hazırlamağın ən yaxşı yolu məhz budur. Buna görə də biz çox yaxşı bir investisiya edirik və şirkətlərinizə, eləcə də bir çox digər təşkilatlara qoşulacaq müxtəlif kadrların hazırlanması üçün əlimizdən gələni edəcəyik".
"Azərbaycan müəllimi" xəbər verir ki, bu fikirləri IE Universitetinin prezidenti Santiago İniguez de Onzono "IE Liderlik və İnnovasiya" Mərkəzinin yaranmasına dair Anlaşma Memorandumunun imzalanması mərasimində söyləyib.
O bildirib ki, IE sahibkarların hazırlanması sahəsində aparıcı mərkəzlərdən biri hesab olunur: "Bizi birləşdirən ortaq cəhətlərdən biri də sahibkarlığa və innovasiyaya sadiqliyimizdir. Biz hazırda dünyada sahibkarlıq üzrə dördüncü yerdəyik, lakin sürətlə irəliləyirik. Eyni zamanda məşğulluq göstəricilərinə görə "Times Higher Education" tərəfindən dünyanın ən yaxşı universitetləri arasında 17-ci yerdə qərarlaşmışıq. Ümid edirəm ki, proqramlarımıza cəlb olunan iştirakçılar həm Azərbaycanda, həm də digər ölkələrdə müxtəlif təşkilatlara qoşulmaq üçün çox yaxşı imkanlara sahib olacaqlar".
O qeyd edib ki, zaman keçdikcə Azərbaycan və daha geniş region üzrə müxtəlif nəsillər üçün nəzərdə tutulmuş bir sıra proqramlar da təklif ediləcək: "IE Universiteti Madriddə yerləşir, lakin biz beynəlxalq universitetik. Məhz buna görə də tərəfdaşlığımız beynəlmiləlləşmə baxımından ən uyğun uyğunlaşmanı təmsil edir. Biz 160-dan çox millətdən olan iştirakçıları bir araya gətiririk və yalnız Madriddə deyil, həm də Nyu-York şəhərində kampuslarımız fəaliyyət göstərir.
Bir neçə il əvvəl biz həmçinin Səudiyyə Ərəbistanı Krallığının Ər-Riyad şəhərində İnnovasiya və Liderlik Mərkəzini açdıq. Bu gün isə Avropa ilə Asiyanı birləşdirəcək bu yeni mərkəzin açılışı ilə qürur duyuruq. Bu, çox ümidverici bir yolun başlanğıcını ifadə edir".
