İşləyən tələbələrin məzun olma göstəriciləri daha yüksəkdir
Az həcmdə işləyən tələbələrin ali təhsili uğurla başa vurmaq ehtimalı işləməyən və ya çox işləyən yaşıdları ilə müqayisədə daha yüksəkdir.
"Azərbaycan müəllimi" xəbər verir ki, bu nəticə Yeni Zelandiyanın Təhsil Nazirliyinin apardığı araşdırmada ortaya çıxıb.
Səkkiz il ərzində ali təhsil müəssisələrində təhsil alan tələbələrin iş fəaliyyətini təhlil edən araşdırmaya görə, aşağı və ya orta səviyyədə ödənişli işdə çalışan tələbələrin məzun olma göstəriciləri həm işləməyən, həm də intensiv işləyən tələbələrdən daha yüksək olub.
Tədqiqat göstərib ki, 2022-ci ildən yaşayış xərclərinin artması ilə tələbələrin işləmə səviyyəsi yüksəlsə də, bu tendensiya dəyişməyib. Nəticələr cins, təhsil forması və etnik mənsubiyyət kimi müxtəlif qruplar üzrə də oxşar olub.
Araşdırmada qeyd edilir ki, aşağı və orta səviyyədə iş yükü ilə təhsil alan tələbələr vaxtlarını daha səmərəli planlaşdırır, təhsil və iş öhdəliklərini daha yaxşı uzlaşdırırlar. Lakin iş saatları artdıqca bu üstünlük azalır və iş tədris prosesinə mənfi təsir göstərməyə başlayır.
Araşdırmaya münasibət bildirən Avstraliya Tələbə Bərabərliyi və Uğuru Mərkəzinin tədqiqat və siyasət direktoru İan Li bildirib ki, qismən məşğulluq tələbələrə vaxtı daha düzgün idarə etməyə kömək edir. Onun sözlərinə görə, müəyyən həddən sonra iş artıq tələbəyə nizam yaratmır, əksinə, dərsə ayırdığı vaxtı azaldır.
Araşdırmada ABŞ və Yeni Zelandiyada aparılmış əvvəlki tədqiqatlara da istinad edilərək qeyd olunur ki, tələbələr üçün həftədə təxminən 20 saata qədər işləmək məqbul hesab olunur. Bu hədd aşıldıqda isə təhsilin keyfiyyətinə mənfi təsir göstərmə ehtimalı artır.
