Naxçıvanda peşə təhsili üzrə 61 vakant yer elan olunub
Avqustun 11-də Naxçıvanda ölkə üzrə mərkəzləşmiş qaydada peşə təhsili müəssisələrinə ixtisas fənn müəllimi və istehsalat təlimi ustası vəzifələrinə işə qəbul üzrə müsabiqənin test imtahanı mərhələsi keçirilib.
"Azərbaycan müəllimi" xəbər verir, test imtahanı Naxçıvan Dövlət Peşə Təhsil Mərkəzində yaradılan İmtahan Mərkəzində təşkil olunub.
Test imtahanında ixtisas fənn müəllimi üzrə iştirak edən namizədlərə təhsil proqramlarına aid 40, tədris metodikası və təlim strategiyaları üzrə 20, istehsalat təlim ustaları üzrə namizədlərə isə tədris metodikası və təlim strategiyaları üzrə 15, əməyin mühafizəsi üzrə 5, təlim metodları üzrə 40 sual təqdim olunub.Sualların cavablandırılması üçün namizədlərə 150 dəqiqə vaxt ayrılıb.
Qeyd edək ki, test imtahanında müvafiq keçid balını toplayan namizədlər müsahibə mərhələsinə dəvət olunacaq.
Məlumat üçün bildirək ki, müsabiqəyə Naxçıvan Muxtar Respublikası Təhsil Nazirliyinin tabeliyində fəaliyyət göstərən peşə təhsil müəsssisələri üzrə 18 ixtisas fənn müəllimi, 43 istehsalat təlim ustası olmaqla, ümumilikdə 61 vakant yer çıxarılıb.
