8 oktyabrda Təhsil İnstitutu, Mədəniyyət və Sənətkarlıq üzrə Bakı Dövlət Peşə Təhsil Mərkəzinin birgə təşkilatçılığı ilə “Narkotik asılılıq və onun formalaşma mərhələləri” mövzusunda seminar təşkil edilib.

Bu barədə “Azərbaycan müəllimi”nə Təhsil İnstitutundan məlumat verilib. Bildirilib ki, ki, seminarda ARTİ-nin böyük elmi işçiləri Könül Nəbiyeva və Gülər Xəlilova günümüzün təhlükəsi hesab olunan narkomaniyaya səbəb ola biləcək halların psixo-pedaqoji vasitələrlə qarşısının alınmasına həsr olunmuş “Narkotik asılılıq və onun formalaşma mərhələləri” adlı təqdimatla çıxış ediblər.

Tədbirdə bəşəriyyətin ən böyük bəlalarından olan narkomaniyanın cəmiyyətin mənəvi, əxlaqi dəyərlərinə böyük zərbə vurduğu, sosial-iqtisadi inkişafa mənfi təsir göstərdiyi, insanların həyat və sağlamlıqlarına ciddi təhlükə yaratdığı vurğulanıb, dövlətimiz tərəfindən narkomaniyaya qarşı mübarizə sahəsində görülən işlər haqqında məlumat verilib və son illər narkotik vasitələrə qarşı mübarizənin xeyli güclənməsindən, dövlət orqanlarının bu sahədəki fəallığından bəhs edilib.

Narkomaniyanın ictimai bəla olaraq cəmiyyətə ziyanı, bu bəla ilə mübarizədə təbliğat və maarifləndirmə işinin gücləndirilməsi, yeniyetmə və gənclərin sağlam həyat tərzi ruhunda tərbiyə edilməsi, müxtəlif zərərli vərdişlərin yayılmasının qarşısının alınması istiqamətində idarə, müəssisə və təşkilatlarda mütəmadi kütləvi tədbirlər təşkil edildiyi diqqətə çatdırılıb. Ölkəmizdə sosial-iqtisadi inkişafın təmin edilməsinin, insanların sağlamlığının qorunmasının, rifah halının yaxşılaşdırılmasının və cəmiyyətdə mənəvi-əxlaqi dəyərlərin önəmi qeyd edilib. Narkomanlığa, narkotik vasitələrin qanunsuz dövriyyəsinə qarşı mübarizənin əhəmiyyəti vurğulanıb, narkomaniya ilə mübarizə sahəsində dövlət siyasətinin strateji istiqamətlərini müəyyən edən bir sıra Qanun və Dövlət Proqramlarının uğurla həyata keçirildiyi bildirilib.