Prezident İlham Əliyevin sərəncamı ilə təsdiqlənən “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nda öz əksini tapan “Məktəbli avtobusları” layihəsinin artıq növbəti tədris ilindən həyata keçirilməsi planlaşdırılır. 

Bu layihənin əsas məqsədi məktəbəqədər və ümumi təhsil müəssisələrində təhsilalanların təhlükəsiz və rahat daşınmasını həyata keçirməkdir. Hamıya məlumdur ki, dərslərin başlanma və bitmə saatlarında yollarda ağır tıxac yaranır. “Məktəbli avtobusları” layihəsinin tətbiqi ilə bu problemin nisbətən aradan qalxacağı güman edilir.

Həmçinin şagirdlərin xüsusi avtobuslarla tədris müəssisələrinə daşınması valideynlərin də işini yüngülləşdirəcək. Bəzi valideynlər övladlarını məktəbə şəxsi avtomobillərlə aparır və ya bunun üçün xüsusi taksi xidmətlərindən istifadə edirlər. Buna görə də “Məktəbli avtobusları” tıxac problemində alternativ həll təqdim etməklə yanaşı, ailələrin maddi yükünü də azalda bilər.

Nəqliyyat eksperti Eldəniz Cəfərov “Azərbaycan müəllimi”nə açıqlamasında bildirib ki, bu layihə Bakı şəhərində az da olsa, tıxacın qarşısını alacaq:

“Sərəncamda əsas məqsəd ondan ibarətdir ki, Bakı şəhərində yollarda sıxlıq və tıxaclar aradan qaldırılsın və insanların sərbəst hərəkəti təmin edilsin. Burada həmçinin təhsil müəssisələrinə məktəblilərin daşınması ilə bağlı vacib müddəa da var. Düşünürəm ki, “Məktəbli avtobusları” layihəsi Bakı şəhəri ərazisində bütün məktəblərdə tətbiq olunmalıdır. Bu layihənin tətbiqi zamanı xüsusən də ibtidai sinif şagirdlərinin daşınması nəzərdə tutulmalıdır. Valideynlər ibtidai sinif şagirdlərinin yaşı az olduğu üçün onları fərdi avtomobilləri və ya taksilərlə məktəbə gətirirlər. Bu da yola çıxan nəqliyyat vasitələrinin sayının artmasına gətirib çıxarır. Təbii olaraq, nəqliyyat vasitələrinin sayının artması tıxaca gətirib çıxarır. Sıxlığın idarə oluna bilməməsi də ciddi tıxaca səbəb olur”.

E.Cəfərov bildirib ki, yeni tədris ilindən tətbiq olunacaq “Məktəbli avtobusu” layihəsi dünyanın bir çox ölkəsində var: “Uzağa getmədən qonşu ölkələrə diqqət yetirsək, görərik ki, bu layihə artıq sınaqdan uğurla keçirilib. Əsas məsələ odur ki, “Məktəbli avtobusu” layihəsi Azərbaycan reallığına uyğun tətbiq edilsin”, – deyə o qeyd edib.