Abşeron-Xızı Regional Təhsil İdarəsinin tabeliyində fəaliyyət göstərən Sumqayıt şəhər 28 nömrəli tam orta məktəbin şagirdi Telman Əsgərov martın 9-da keçirilən buraxılış imtahanında maksimum bal toplayaraq region birincisi adı qazanıb.

"Azərbaycan müəllimi"nə müsahibəsində istedadlı şagird birinci sinifdən bugünə qədər əlaçı olduğunu deyir. İnformatika, riyaziyyat, Azərbaycan dili fənlərini çox sevən yeniyetmə 3 dəfə Respublika fənn olimpiadalarında iştirak edib.  2023, 2024, 2025-ci illərdə Azərbaycan dili və riyaziyyat fənləri üzrə olimpiadalara qatılan məktəbli final mərhələyə qədər yüksələ bilməsə də, hər birində yarımfinal turuna vəsiqə qazanıb: "Mənə bu müddətdə bütün müəllimlərim çox böyük dəstək olub. Ancaq Azərbaycan dili müəllimim Aytən İslamzadəni xüsusilə qeyd etmək istəyirəm. Müəllimim mənə bu yolda çox kömək göstərib. Valideynlərim də hər cür dəstək olur, onların mənəvi dəstəkləri əvəzolunmazdır. Buraxılış imtahanı mənim üçün çox gözəl keçdi, imtahan suallarını asanlıqla yazdım".

Telman vurğulayır ki, imtahana hazırlaşarkən sadəcə müəllimin verdiyi tapşırıqlarla kifayətlənmir, özü də əlavə tapşırıqlar işləyərək, inkşaf etməyə çalışıb: "Özümə əminlik olsa da, həyəcan hər imtahanda olduğu kimi, bu imtahanda da var idi. Maksimal nəticə göstərdiyim üçün çox sevincliyəm. Bu nəticə məni çox ruhlandırır, blok imtahanı hazırlığı üçün daha da həvəsləndirir. Gələcəkdə böyük şirkətlərdə proqramçı kimi çalışmaq istəyirəm. Bu ixtisası seçmə səbəbim uşaqlıqdan kompüterlərə olan həvəsimdir. Məni buraya cəlb edən isə bu ixtisasın çoxşaxəliyi və mürəkkəbliyidir".