Müasir təhsil müəssisələrinin uğurlu fəaliyyəti yalnız tədris prosesinin keyfiyyətindən deyil, həm də təsərrüfat işlərinin düzgün təşkilindən asılıdır. Bu baxımdan təsərrüfat işləri üzrə direktor müavini məktəbin idarəetmə strukturunda vacib mövqe tutur. Onun əsas funksiyaları məktəbin maddi-texniki bazasının qorunub saxlanılmasını, tədris mühitinin sanitar-gigiyenik tələblərə uyğun təşkilini və təhlükəsizlik tədbirlərinin icrasını əhatə edir.

"Azərbaycan müəllimi" xəbər verir ki, “Təhsil sahəsinə aid olan qulluqçu vəzifələrinin Vahid Tarif-İxtisas Sorğu Kitabçası”nın təsdiq edilməsi barədə Azərbaycan Respublikasının Əmək və Əhalinin Sosial Müdafiəsi Nazirliyinin Kollegiyasının “20” dekabr 2017-ci il tarixli qərarında ümumtəhsil müəssisələrində fəaliyyət göstərən təsərrüfat işləri üzrə direktor müavininin əmək funksiyası aşağıdakı kimi müəyyən olunmuşdur:

- Məktəbin təsərrüfat işlərinə rəhbərlik edir;
- Təsərrüfat inventarlarının qorunub saxlanılmasını, məktəb binasının, kabinetlərin və sinif otaqlarının, həyətin təmiz saxlanılmasını təmin edir;
- Kabinetlərdə və sinif otaqlarında, idman zalında, yeməkxanada sanitar-gigiyenik vəziyyəti nəzarətdə saxlayır;
- Məktəb binasında cari təmir işlərinin aparılmasını, onun avadanlıqlarla, inventar və materiallarla təchiz olunmasını, yanğından mühafizə qaydalarına düzgün əməl olunmasını və istehsalat sanitariyasını təmin edir.

Təsərrüfat işləri üzrə direktor müavini nələri bilməlidir?

- “Təhsil haqqında” və “Uşaq hüquqları haqqında” Azərbaycan Respublikasının qanunlarını; 
- təsərrüfat xidməti üzrə işin yerinə yetirilməsinin təşkilini; 
- xidmətçi heyətin əməyindən səmərəli istifadə yollarını; 
- binanın istismar olunmasının təşkilinin elmi əsaslarını; 
- əmək qanunvericiliyini; 
- əməyin mühafizəsi, təhlükəsizlik texnikası, sanitar-gigiyena və yanğından mühafizə norma və qaydalarını.

Təsərrüfat işləri üzrə direktor müavini məktəbin ümumi fəaliyyətinin effektiv şəkildə təşkilində mühüm rol oynayır. O, təsərrüfat sahəsində müvafiq qanun və qaydalara əməl etməklə yanaşı, məktəbin maddi-texniki bazasının qorunub saxlanılması, sanitar-gigiyenik qaydalara riayət edilməsi və təhlükəsizlik tədbirlərinin təmin olunması üçün məsuliyyət daşıyır. Bu vəzifənin uğurla icrası üçün müavin yalnız nəzəri biliklərə deyil, eyni zamanda praktik idarəetmə bacarıqlarına da sahib olmalıdır. Onun səmərəli fəaliyyəti məktəbin davamlı tədris prosesini və təhlükəsiz mühitini təmin etmək baxımından zəruridir.