Təşkilatçılıq çox yüksək səviyyədədir - SAF 2025-ə qatılan İsveçrə komandasının üzvü
Bakıda keçirilən STEAM Azərbaycan Festivalında (SAF 2025) iştirak edən İsveçrə komandasının nümayəndəsi Sebastian Etter təəssüratlarını “Azərbaycan müəllimi” ilə bölüşüb.
O bildirib ki, festival öncəsi hazırlıqlar İsveçrədə aparılıb və yerli komanda yarış üçün təlimatlandırılıb.
“Dünən Bakıya gəldim və buradakı insanlarla tanış oldum. Könüllülərin fəaliyyəti və ümumilikdə festivalın təşkilatçılığı çox yüksək səviyyədədir”, – deyə Sebastian Etter qeyd edib.
Festivalda iştirak edən İsveçrə komandası 8–12 yaşlı məktəblilərdən ibarətdir. Onlar yarışa ciddi hazırlaşaraq qatılıblar. Etter şagirdlərin motivasiyasını yüksək qiymətləndirərək deyib: “Onlar çox ağıllı və istedadlıdırlar. Hazırda günün ikinci yarısındakı mərhələyə hazırlaşırlar”.
Qeyd edək ki, festivalda iştirak üçün ümumilikdə 5000-dən çox iştirakçı qeydiyyatdan keçib, final mərhələsinə onların 1400-dən çoxu vəsiqə qazanıb. İştirakçıların 202-i 19 xarici ölkəni təmsil edir.
Beynəlxalq STEAM Azərbaycan Festivalı 19 noyabr tarixinədək davam edəcək.
