“UI GreenMetric” çərçivəsində ADNSU-da yeni beynəlxalq əməkdaşlıqların əsası qoyulub
23–25 sentyabr tarixlərində Azərbaycan Dövlət Neft və Sənaye Universitetinin (ADNSU) ev sahibliyi və təşkilatçılığı, Elm və Ali Təhsil üzrə Dövlət Agentliyinin dəstəyi ilə keçirilən “UI GreenMetric Dayanıqlı Universitetlərin Reytinqi: 2026-cı il üzrə nəticələr və mükafatlandırma mərasimi” çərçivəsində ADNSU ilə müxtəlif ölkələri təmsil edən 16 ali təhsil müəssisəsi arasında gələcək əməkdaşlıq perspektivləri müzakirə olunub və yeni əməkdaşlıq razılaşmalarına dair təşəbbüslər irəli sürülüb.
"Azərbaycan müəllimi" xəbər verir ki, Türkiyənin Istanbul Yeni Yüzyıl University, Bandırma 17 Eylül University, Istanbul Kültür University və Bingöl University, Qazaxıstanın Toraighyrov University, Özbəkistanın Kimyo International University in Tashkent, Qırğızıstanın Jalal-Abad International University, Malayziyanın Universiti Kebangsaan, Filippinin Sorsogon State University, Pakistanın Northern University, Efiopiyanın Kabridahar University və Haramaya University, Hindistanın Institute of Certified Forensic Accountants Asia Pacific, İraqın Al-Kitab University, Al-Qalam University və University of Kirkuk ali təhsil müəssisələrinin rəhbər və nümayəndə heyətləri ilə görüşlər keçirilib və yeni əməkdaşlıqların əsası qoyulub.
Tədbirin mühüm nəticələrindən biri ADNSU-nun beynəlxalq universitetlər şəbəkəsi ilə yanaşı, Azərbaycanın digər ali təhsil müəssisələri üçün də yeni beynəlxalq əməkdaşlıq imkanlarının formalaşdırılmasına şərait yaratması olub. Tədbir çərçivəsində Azərbaycandan və xaricdən iştirak edən ali təhsil müəssisələri arasında birbaşa təmasların qurulması və birgə əməkdaşlıq imkanlarının müzakirəsi üçün geniş platforma yaradılıb.
ADNSU-nun təşkilatçılığı ilə formalaşan bu beynəlxalq şəbəkələşmə mühiti nəticəsində Azərbaycanın digər ali təhsil müəssisələri ilə xarici universitetlər arasında da yeni əməkdaşlıq təşəbbüslərinə start verilib və 20-yə yaxın yerli və xarici ali təhsil müəssisəsi arasında əməkdaşlıq sazişlərinin imzalanmasına şərait yaradılıb.
Beləliklə, tədbir yalnız beynəlxalq reytinq nəticələrinin təqdim olunduğu və mükafatlandırma mərasiminin keçirildiyi platforma deyil, eyni zamanda Azərbaycan ali təhsil müəssisələrinin beynəlxalq əlaqələrinin genişləndirilməsinə, yeni tərəfdaşlıqların qurulmasına və universitetlərarası əməkdaşlıq şəbəkəsinin inkişafına xidmət edən mühüm beynəlxalq platforma kimi yadda qalıb.
