"Zəfərin hər səhifəsində qəhrəmanlarımızın fədakarlığı yazılıb” - Qazi müəllim 

O, 44 günlük Vətən müharibəsində tank taqımının komandiri olaraq ön cəbhədə döyüşüb, ağır yaralanıb və uzun müalicələrdən sonra yenidən ayağa qalxıb. Bu gün isə həm çağırışaqədərki hazırlıq rəhbəri kimi gələcək nəsli yetişdirir, həm də “Naxçıvan Qaziləri” İctimai Birliyinin sədri kimi igid oğullarımızın həyat yoldaşlarının mənafelərinin qorunması, onların sosial problemlərinin həlli istiqamətində mühüm addımlar atır.

Söhbət ehtiyatda olan baş leytenant və Şərur rayon Kürkənd tam orta məktəbinin gənclərin çağırışaqədərki hazırlığı (GÇH) rəhbəri Əli Əlisoydan gedir. 

“Azərbaycan müəllimi” 8 Noyabr – Zəfər Günü ərəfəsində onunla döyüş yolu, Vətən müharibəsində yaşadıqları və bu gün gənclərə ötürdüyü vətənpərvərlik mesajları barədə söhbətləşib. Məlumat üçün bildirək ki, Əli Əlisoy Azərbaycan Respublikasının ərazi bütövlüyü uğrunda göstərdiyi şücaətə görə “Cəsur döyüşçü”, “Füzulinin azad olunmasına görə” və “Vətən müharibəsi iştirakçısı” medalları ilə təltif edilib.

- 8 Noyabr – Zəfər Günü sizin üçün nə ifadə edir? Bu tarixi hansı hisslərlə qarşılayırsınız?

- 8 Noyabr mənim üçün şəhidlərimizin qanı, qazilərimizin sağlamlığı, əsgər və zabitlərimizin fədakarlığı hesabına qazanılmış tarixi Zəfərin rəmzidir. Bu günü böyük qürur hissi ilə qarşılayıram. Bununla yanaşı, aramızda olmayan silahdaşlarımızı da dərin hüznlə xatırlayıram. Mənim üçün Zəfər həm qürur, həm minnətdarlıq, həm də bu tarixi gələcək nəsillərə düzgün çatdırmaq məsuliyyətidir.

- Vətən müharibəsi başlayanda döyüşlərdə iştirak etmək qərarınızı necə verdiniz?

- Mən hərbçi idim və Vətən qarşısında daşıdığım məsuliyyəti, üzərimə götürdüyüm vəzifənin mahiyyətini yaxşı dərk edirdim. Vətən müharibəsi başlayanda söhbət torpaqlarımızın azadlığından, xalqımızın təhlükəsizliyindən və dövlətimizin gələcəyindən gedirdi. Belə bir taleyüklü məqamda hərbi andıma sadiq qalmaq, Vətənimə xidmət etmək və üzərimə düşən vəzifəni yerinə yetirmək mənim üçün həm peşə borcu, həm də mənəvi məsuliyyət idi. Buna görə də döyüşlərdə iştirak etmək qərarını tərəddüd etmədən verdim. Əsas məqsədim silahdaşlarımla çiyin-çiyinə döyüşmək, verilən tapşırıqları layiqincə yerinə yetirmək və Vətənimizin qələbəsinə öz töhfəmi vermək idi.

- Döyüşlərdə yaddaşınızda ən dərin iz buraxan hadisə hansıdır?

- Döyüşlərdə elə hadisələr yaşanır ki, onları illər keçsə də unutmaq mümkün olmur. Tankımın iki dəfə vurulması, ağır yaralanmağım və ölüm təhlükəsi ilə üz-üzə qalmağım yaddaşımda dərin iz buraxıb. Müalicə və əməliyyatlar uzun və çətin olub. Ancaq yaddaşımda yalnız yaralarım deyil, itirdiyimiz silahdaşlarımızın xatirəsi da yaşayır. Müharibənin ən ağır tərəflərindən biri insanın öz həyatı ilə yanaşı, qardaşlaşdığı insanların taleyi üçün də narahat olmasıdır.

- Müharibə Vətən, torpaq və azadlıq anlayışlarına münasibətinizi necə dəyişdi?

- Mən Vətənimi canımdan artıq sevirəm və onun uğrunda hər zaman canımdan keçməyə hazıram. Döyüş meydanında Vətən anlayışının nə qədər dərin və müqəddəs məna daşıdığını daha dərindən dərk etdim. Anladım ki, Vətən yalnız doğulduğun kənd, yaşadığın ev, böyüdüyün torpaq deyil. Vətən həm də ailəmiz, övladlarımızın gələcəyi, milli kimliyimiz, bayrağımız, tariximiz və xalqımızın azad yaşamaq haqqıdır.

Müharibə insana torpağın hər qarışının, azadlığın hər anının və sülhün hər gününün nə qədər qiymətli olduğunu daha aydın göstərir. Döyüş meydanında insan bir daha anlayır ki, Vətəni qorumaq yalnız torpağı müdafiə etmək deyil, həm də xalqın gələcəyini, milli dəyərlərini və azadlığını qorumaq deməkdir. Bu təcrübə mənim Vətənə bağlılığımı daha da gücləndirdi, torpağımıza, xalqımıza və milli-mənəvi dəyərlərimizə olan sevgimi daha da dərinləşdirdi.

Bu gün bir müəllim kimi qazandığım həyat və döyüş təcrübəsini şagirdlərimlə bölüşür, onlara Vətən sevgisinin yalnız sözlərlə deyil, əməli işlərlə, dürüstlüklə, məsuliyyətli davranışla və cəmiyyətə fayda verməklə sübut olunduğunu aşılayıram.

Mənim üçün Vətən sevgisi həm də gələcək nəsillərə azad, təhlükəsiz və firavan bir ölkə əmanət etmək məsuliyyətidir. İnanıram ki, Vətəni sevmək onun tarixini və dəyərlərini qorumaq, bu gününə sahib çıxmaq və gələcəyi naminə yorulmadan çalışmaq deməkdir.

- Zəfər xəbərini eşitdiyiniz anı necə xatırlayırsınız?

- Zəfər xəbərini böyük qürur və sevinclə qarşıladım. Ağır döyüşlərdən, itkilərdən və yaralanmalardan sonra xalqımızın illərlə həsrətində olduğu tarixi günə qovuşması mənə sözlə ifadə edilməsi çətin olan, unudulmaz duyğular yaşatdı. Həmin an ilk düşüncələrimdən biri şəhidlərimiz oldu. Kaş bu müqəddəs Zəfər Gününü bütün silahdaşlarımızla birlikdə qarşılaya, bu sevincə onların da şahidlik etdiyini görə biləydik...

Bu Zəfər mənim üçün yalnız qələbə sevinci deyil. O, həm də Vətən uğrunda canından keçən şəhidlərimizin əziz xatirəsi qarşısında dərin ehtiram, qazilərimizin fədakarlığına sonsuz minnətdarlıq və bu tarixi qələbənin məsuliyyətini daşımaq deməkdir. Qəlbimizdə qürurla yanaşı, heç vaxt unudulmayacaq bir nisgil də var. Çünki bu Zəfərin hər səhifəsində qəhrəmanlarımızın qanı, fədakarlığı və Vətən sevgisi yazılıb.

Zəfərimiz mübarizəmizin, birliyimizin və sarsılmaz iradəmizin təntənəsidir. Şəhidlərimizin əziz xatirəsi isə bu qələbəni bizim üçün əbədi olaraq müqəddəs və əvəzsiz edir.

- Müharibədən sonra təhsil sahəsində fəaliyyət göstərmək sizin üçün nə demək idi?

- Müharibədən sonra təhsil sahəsində fəaliyyətimi davam etdirmək həyatın yeni mərhələsinə qədəm qoymaq demək idi. Döyüş meydanında Vətəni qorumağa çalışmışdıqsa, məktəbdə onun gələcəyini yetişdirmək məsuliyyətini daşıyırıq. Müharibədən sonra gündəlik həyata uyğunlaşmaq və işinə davam etmək həmişə asan olmur. Bununla belə, müəllimlik mənə həyat təcrübəmi bölüşmək, gənclərə bilik vermək və onların gələcəyinə töhfə vermək imkanı yaradır.

- Cəbhədə qazandığınız təcrübə müəllimlik fəaliyyətinizə təsir edirmi?

- Bəli, döyüş təcrübəm müəllimlik fəaliyyətimə təsir göstərib. Müharibə insana intizamı, səbirli olmağı, çətin vəziyyətdə düzgün qərar verməyi və kollektiv məsuliyyətin əhəmiyyətini öyrədir. Bu prinsiplər məktəbdə də vacibdir. Şagirdlərə yalnız qaydalara əməl etməyi deyil, qərarlarının nəticələrini düşünməyi, bir-birinə hörmət göstərməyi və çətinliklər qarşısında ruhdan düşməməyi aşılamağa çalışıram. İnanıram ki, müəllimin şəxsi nümunəsi verdiyi bilik qədər əhəmiyyətlidir.

- Şagirdlər sizin müharibə iştirakçısı olduğunuzu biləndə necə reaksiya verirlər? Vətən müharibəsi iştirakçısı və qazisi kimi yaşadığınız təcrübələri şagirdlərlə bölüşərkən onlara hansı dəyərləri aşılamağa çalışırsınız?

- Şagirdlər Vətən müharibəsi qazisi olduğumu biləndə məndə böyük maraq doğuran suallar verirlər. Onlar 44 günlük Vətən müharibəsi, döyüşlər, tanklar, hərbçilərin qarşılaşdıqları çətinliklər, cəbhədə yaşanan hadisələr və qələbəyə gedən yol haqqında daha ətraflı məlumat almaq istəyirlər. Bəzən onların suallarında sadəcə maraq deyil, həm də heyrət, qürur və Vətənimizin tarixinə daha yaxından bələd olmaq istəyi hiss olunur.

Mən də çalışıram ki, onların hər bir sualını yaşlarına, dünyagörüşlərinə və mənəvi hazırlıqlarına uyğun şəkildə, səmimi və aydın cavablandırım. Çünki hesab edirəm ki, müharibə haqqında danışmaq yalnız baş verən hadisələri xatırlamaq deyil, həm də həmin hadisələrin mahiyyətini, insan talelərinə təsirini və gələcək nəsillər üçün daşıdığı mənanı izah etməkdir.

44 günlük Vətən müharibəsi Azərbaycan xalqının birliyini, həmrəyliyini, əzmini və torpaqlarımızın azadlığı uğrunda göstərdiyi iradəni nümayiş etdirən mühüm tarixi hadisədir. Bu qələbə uzun illər doğma torpaqlarından ayrı düşmüş insanların qayıdış ümidini gerçəkləşdirdi, xalqımızın milli qürurunu və özünəinamını daha da gücləndirdi. 

Şagirdlərə izah edirəm ki, qələbənin arxasında böyük zəhmət, fədakarlıq, ağır sınaqlar və insan taleləri dayanır. Bu tarixi yalnız qürur hissi ilə deyil, həm də dərin məsuliyyətlə dərk etmək lazımdır.

Müharibə iştirakçısı kimi mənim üçün həmin günlərin xatirələri təkcə döyüş səhnələrindən ibarət deyil. Bu xatirələr çətin anlarda bir-birinə dayaq olan silahdaşları, Vətən qarşısında məsuliyyət hissini, insanın iradəsini və həyatın əsl dəyərini də əhatə edir.

Müharibə bir daha göstərdi ki, ən çətin şəraitdə belə birlik, inam və mənəvi güc insan üçün böyük dayaqdır. Qazilik isə mənim üçün həm yaşanmış hadisələrin məsuliyyətini daşımaq, həm də bu təcrübədən düzgün nəticələr çıxararaq gələcək nəsillərə örnək olmaq deməkdir.

Müəllim kimi düşünürəm ki, bu təcrübənin şagirdlərlə bölüşülməsi xüsusi əhəmiyyət daşıyır. Çünki onların qarşısında həm tariximizi yaşamış bir insan, həm də gələcəyimizin formalaşmasında məsuliyyət daşıyan bir hərbi rəhbər kimi dayanıram. İstəyirəm ki, şagirdlər Vətən sevgisinin yalnız sözlərlə ifadə olunmadığını, onun biliklə, zəhmətlə, məsuliyyətlə, dürüstlüklə və ölkəmizin inkişafına töhfə verməklə yaşadıldığını anlasınlar.

Eyni zamanda, şagirdlərimlə 44 günlük Vətən müharibəsindən danışarkən rəşadətli ordumuzun döyüş şücaətini xüsusi qeyd edirəm.  

Bilirsiniz, müharibə filmlərdə və kitablarda təsvir olunan qəhrəmanlıq səhnələrindən daha mürəkkəb və ağırdır. Onun arxasında insan həyatı, ayrılıqlar, itkilər, yarımçıq qalan arzular və uzun müddət unudulmayan xatirələr dayanır. Buna görə də şagirdlərə müharibədən danışarkən qəhrəmanlığı və fədakarlığı vurğulamaqla yanaşı, insan həyatının toxunulmazlığını, sülhün əvəzsiz dəyərini və münaqişələrin ağır nəticələrini də izah etməyə çalışıram.

Mənim əsas məqsədim şagirdlərdə yalnız keçmişimizlə bağlı qürur hissi yaratmaq deyil, həm də onlarda tarixi hadisələrə məntiqli münasibət formalaşdırmaqdır. İstəyirəm ki, onlar 44 günlük Vətən müharibəsinin əhəmiyyətini dərindən anlasın, qazanılmış qələbənin məsuliyyətini dərk etsinlər.

Bizim borcumuz tariximizi gənc nəslə düzgün çatdırmaq, onları savadlı, milli-mənəvi dəyərlərə bağlı, vətənini sevən vətəndaşlar kimi yetişdirməkdir. Çünki ən böyük uğur yalnız qələbə qazanmaq deyil, həmin qələbənin bizə qazandırdığı tarixi imkanları qorumaq, ölkəmizi inkişaf etdirmək və gələcək nəsillərə daha təhlükəsiz, firavan bir həyat bəxş etməkdir.

- Keçdiyiniz döyüş yolu ilə çağırışaqədərki hazırlıq rəhbəri olaraq üzərinizə düşən məsuliyyəti birləşdirmək sizdən hansı mənəvi gücü tələb edir? Şəxsi təcrübəniz şagirdlərin vətənpərvərlik ruhunda, intizamlı və məsuliyyətli yetişməsinə nə kimi təsir göstərir?

- Çağırışaqədərki hazırlıq rəhbəri olmaq həm böyük mənəvi dözüm, həm də yüksək məsuliyyət tələb edir. Qazi olaraq döyüş meydanında yaşadıqlarım, qarşılaşdığım çətinliklər və keçdiyim sınaqlar həyata baxışımı, düşüncələrimi və insanlara münasibətimi formalaşdırıb. Müharibənin insanın yaddaşında və qəlbində buraxdığı izlər hər zaman görünməsə də, onun daxilində yaşatdığı duyğular bəzən sözlə ifadə etməkdə çətinlik çəkdiyi qədər dərindir.

Çağırışaqədərki hazırlıq rəhbəri olaraq mənim vəzifəm yalnız şagirdlərə hərbi biliklər aşılamaq, onlara nizam-intizam qaydalarını və ilkin hərbi hazırlığın əsaslarını öyrətməklə məhdudlaşmır. Eyni zamanda, onlarda vətənə bağlılıq, məsuliyyət, cəsarət, iradə, intizam və yoldaşlıq kimi vacib keyfiyyətləri formalaşdırmağa çalışıram. Çünki Vətəni sevmək yalnız sözlə ifadə olunan hiss deyil, həm də onu qorumağın məsuliyyətini dərk etmək, üzərinə düşən vəzifəni anlamaq və çətinliklər qarşısında möhkəm dayanmaqdır. İstəyirəm ki, şagirdlərim hərbi hazırlığın mahiyyətini yalnız nəzəri biliklərdən ibarət görməsinlər, eyni zamanda bu biliklərin insana aşıladığı məsuliyyəti və mənəvi dəyərləri də mənimsəsinlər.

Keçdiyim həyat yolu mənə bir daha göstərdi  ki, insanın gücü yalnız fiziki dözümlülüyü ilə ölçülmür. Əsl güc çətinliklər qarşısında iradəni qorumaqda, məsuliyyətdən yayınmamaqda, nizam-intizama əməl etməkdə və Vətən qarşısında borcunu dərk etməkdədir. Mən şagirdlərə yalnız danışdıqlarımla deyil, davranışımla, işimə münasibətimlə və üzərimə düşən vəzifəni yerinə yetirməyimlə də örnək olmağa çalışıram.

Əlbəttə, müəllim kimi fəaliyyət göstərmək hər zaman asan deyil. Bəzən insanın daxilində yaşadığı çətinliklər, keçmişin xatirələri və gündəlik məsuliyyətlər mənəvi dözüm tələb edir. Lakin sinfə daxil olduğum zaman qarşımda dayanan yeniyetmələrin gələcəyini, onların Vətənə layiqli vətəndaş kimi yetişməsində üzərimə düşən məsuliyyəti düşünürəm. Bu məsuliyyət mənə güc verir, fəaliyyətimə daha böyük həvəslə yanaşmağa sövq edir.

- Sizcə, müəllimlik peşəsi ilə Vətənə xidmət arasında hansı mənəvi bağlılıq var? 

- Mənim üçün müəllimlik də Vətənə xidmətin ən şərəfli və məsuliyyətli formalarından biridir. Çünki Vətənə xidmət yalnız onun sərhədlərini qorumaqla məhdudlaşmır, eyni zamanda ölkənin gələcəyini qurmaq, milli dəyərlərimizi yaşatmaq və savadlı, vətənpərvər, məsuliyyətli gənclər yetişdirmək deməkdir.

Müharibədə olduğum müddətdə hərbiçi kimi  Vətənimizin  təhlükəsizliyinin qorunması, torpaqlarımızın müdafiəsi və dövlətimizin suverenliyinin təmin olunması əsas missiyam idi.  Bu gün isə müəllim kimi fəaliyyət göstərərək ölkəmizin gələcəyini formalaşdıran gənclərin bilikli, savadlı, milli-mənəvi dəyərlərə bağlı və cəmiyyət qarşısında məsuliyyətini dərk edən şəxsiyyətlər kimi yetişməsinə töhfə verməyə çalışıram. Fəaliyyət sahələrim fərqli olsa da, hər iki peşənin təməlində eyni amal dayanır: Vətənə sədaqətlə xidmət etmək.

İnanıram ki, güclü dövlətin həm etibarlı ordusu, həm də savadlı və düşünən gəncliyi olmalıdır. Ordu ölkənin təhlükəsizliyini qoruyur, təhsil isə həmin ölkənin intellektual potensialını, mənəvi dəyərlərini və gələcək inkişafını təmin edir. Bu baxımdan müəllimin üzərinə düşən vəzifə yalnız şagirdlərə bilik verməklə bitmir. Müəllim həm də onlara düzgün düşünməyi, milli kimliyini qorumağı, dövlətinə və xalqına bağlı olmağı, çətinliklər qarşısında iradəli və məsuliyyətli davranmağı öyrədir.
Döyüşçü kimi Vətənin bu gününü qorumağa, müəllimlikdə isə onun sabahını qurmağa çalışmışam. Mənim üçün bu iki fəaliyyət bir-birini tamamlayan, eyni mənəvi dəyərlərə söykənən və vahid məqsədə-Vətənimizin daha güclü, savadlı və firavan gələcəyinə xidmət edən şərəfli yollardır.

- Şəhidlərimizin əziz xatirəsini yaşatmaq, qazilərimizin qəhrəmanlıq salnaməsini və döyüş təcrübəsini gələcək nəsillərə çatdırmaq məqsədilə hansı layihələrin həyata keçirilməsini məqsədəuyğun hesab edirsiniz?

- Şəhidlərimizin əziz xatirəsinin yaşadılması, qazilərimizin keçdiyi şərəfli döyüş yolunun öyrənilməsi və bu zəngin tarixi irsin gələcək nəsillərə çatdırılması üçün sistemli və davamlı layihələrin həyata keçirilməsi olduqca vacibdir. Bu məqsədlə ümumtəhsil məktəblərində “Canlı tarix”, “Qəhrəmanlar unudulmur”, “Şəhidlərimizin izi ilə” və “Qəhrəmanlıq dərsləri” kimi maarifləndirici layihələr təşkil oluna bilər.

“Naxçıvan Qaziləri” İctimai Birliyi olaraq məktəblərlə davamlı əməkdaşlığın, maarifləndirici görüşlərin və yerli qəhrəmanlıq tarixinin sənədləşdirilməsinin əhəmiyyətini yüksək qiymətləndirirəm.Məqsədimiz tarixi yaddaşı qorumaq və gələcək nəsillərə ötürməkdir.

- 8 Noyabr - Zəfər Günü ərəfəsində döyüş yoldaşlarınıza, müəllim həmkarlarınıza və şagirdlərinizə hansı mesajı çatdırmaq istərdiniz?

- İlk növbədə, bütün döyüş yoldaşlarımı qarşıdan gələn  8 Noyabr – Zəfər Günü münasibətilə ürəkdən təbrik edirəm. Bu şanlı Zəfər bizə xalqımızın birliyini, dövlətimizin qüdrətini və Vətən sevgisinin sarsılmaz gücünü bir daha nümayiş etdirdi.

Torpaqlarımızın azadlığı uğrunda canından keçən şəhidlərimizə Allahdan rəhmət, onların ailələrinə səbir və dözüm, qazilərimizə isə möhkəm cansağlığı, uzun ömür arzulayıram.

Müəllim həmkarlarıma müraciət edərək demək istəyirəm ki, bizim missiyamız yalnız şagirdlərə bilik verməklə məhdudlaşmır. Eyni zamanda, onların qəlbində milli-mənəvi dəyərlərə hörmət, yüksək vətəndaşlıq məsuliyyəti, dürüstlük və Vətənə sədaqət hisslərini formalaşdırmalıyıq. Çünki gələcəyin güclü Azərbaycanını məhz savadlı, vətənpərvər və məsuliyyətli gənclər yetişdirəcək.
Şagirdlərə isə yaxşı oxumaqlarını, daim öz üzərilərində işləmələrini, dürüst və məqsədyönlü olmalarını tövsiyə edirəm. 
Zəfərimiz tariximizin qürur səhifəsi, gələcək nəsillər üçün isə əbədi örnəkdir.