ABŞ universitetlərində akkreditasiya sistemi dəyişir: Yeni qaydalar hazırlanıb
ABŞ Təhsil Nazirliyi ali təhsil müəssisələrinin akkreditasiyası sisteminin yenidən qurulmasını nəzərdə tutan yeni qaydalar paketini ictimai müzakirəyə çıxarıb.
“Azərbaycan müəllimi” xəbər verir ki, təklif olunan dəyişikliklər akkreditasiya prosesinin sadələşdirilməsini, tələbələrin təhsilə yatırdığı vəsait qarşılığında daha yaxşı nəticə əldə etməsini və ali məktəblərin tələbə nəticələrinə görə daha çox məsuliyyət daşımasını nəzərdə tutur.
Nazirliyin fikrincə, mövcud sistemdə az sayda akkreditasiya qurumu uzun illər dominant mövqedə olub. Yeni qaydalar bu inhisarların zəiflədilməsinə, yeni akkreditasiya qurumlarının tanınmasının asanlaşdırılmasına və ali təhsildə rəqabət və innovasiyanın artırılmasına yönəlib.
Təkliflərdə akkreditasiyanın əsas meyarlarının tələbələrin vaxtında məzun olması, ixtisası üzrə iş tapması və ailəni təmin edə biləcək gəlir əldə etməsi kimi real nəticələrlə əlaqələndirilməsi nəzərdə tutulur. Eyni zamanda, akademik azadlığın, fikir müxtəlifliyinin və elmi-tədqiqatların bütövlüyünün qorunması da prioritet kimi müəyyənləşdirilib.
Nazirlik akkreditasiya sisteminin təhsil xərclərinin artmasına və universitetlərdə inzibati yükün böyüməsinə səbəb olduğunu bildirir. Yeni yanaşmanın məqsədləri sırasında ali təhsilin əlçatanlığının artırılması, təhsilin əmək bazarının tələbləri ilə daha sıx əlaqələndirilməsi və ali məktəblərin nəticələrə görə hesabatlılığının gücləndirilməsi göstərilir.
Yekun qaydalar hələ təsdiqlənməyib. İctimaiyyətin təkliflərlə bağlı rəyləri 21 sentyabr 2026-cı ilədək qəbul ediləcək.
