"Atam dedi ki, I olmasan, gimnastikaya qoymayacağam" - Ölkə birincisi
Gəncə-Daşkəsən Regional Təhsil İdarəsinin tabeliyində olan Gəncə şəhər İsmət Qayıbov adına 1 nömrəli tam orta məktəbin 4-cü sinif şagirdi Safura Abbasova Bakı şəhərində keçirilən bədii gimnastika üzrə ölkə yarışmasında I yerə layiq görülərək həm müəllimlərinin, həm də sinif yoldaşlarının qürur mənbəyinə çevrilib.
Kiçik yaşına baxmayaraq, böyük əzmkarlıq nümayiş etdirən Safura uğur hekayəsini “Azərbaycan müəllimi” ilə bölüşüb.
“Dözümlülük, əzm, səbir, məqsəd lazımdır”
Safura özünü belə təqdim edir: “Mən Abbasova Safura Hüseyn qızı 17 sentyabr 2015-ci ildə Moskva şəhərində anadan olmuşam. Hazırda Gəncə şəhəri İsmət Qayıbov adına 1 nömrəli tam orta məktəbin 4 “E” sinfində oxuyuram”.
Onun incəsənətə və səhnəyə marağı hələ erkən yaşlardan formalaşıb: “İlk dəfə 4 yaşımda Moskvada olanda xoreoqrafiya ilə məşğul olmuşam, son 2 ildə yenidən davamlı şəkildə məşğul oluram. Həmişə səhnədə olmağın xəyalını qurub, 1-cilik qazanmaq istəmişəm. Özümə inamım, məqsədim və müəllimim Larisa Aleksandrovnanın dəstəyi sayəsində ilk səhnəmə çıxdım və 1-ci yeri qazandım”.
Yarış anları isə onun üçün həm həyəcanlı, həm də məsuliyyətli olub: “Sonda nəticəmin necə olacağı məni çox həyəcanlandırırdı. Çünki atam “1-ci olmasan, gimnastikaya qoymayacağam”, - demişdi”.
Qələbə xəbəri isə Safuranın sevincini sözlə ifadə olunmaz edib. Bu uğurun arxasında isə ciddi zəhmət dayanır: “Həftədə 6 dəfə 3-4 saat məşqə gedirdim. Son bir ayda çox çalışdım”.
Safura həm dərslərini, həm də idmanı paralel şəkildə davam etdirməyin çətinliyini gizlətmir, amma bunun öhdəsindən gəlməyi bacarır: “Yorulsam da, hər ikisinin öhdəsindən gəlirəm, vaxtımı düzgün planlayıram və sevərək çalışıram”.
Gələcək planları isə maraqlıdır. Safura əsas peşə olaraq fərqli sahəni seçsə də, gimnastikanı həyatından çıxarmaq istəmir: “Diş həkimi olmaq istəyirəm, hobbi kimi gimnastika ilə məşğul olmaq arzusundayam”.
Bununla yanaşı, o, özünü daha böyük arenalarda da görür: “Özümü beynəlxalq yarışlarda Azərbaycanı təmsil edən bir gimnast kimi görürəm”.
Safuranın uğur fəlsəfəsi də kifayət qədər aydındır:“Uğur mənim üçün zəhmətin nəticəsini görmək və məqsədinə çatmaqdır”.
O, yaxşı gimnast olmağın əsas şərtlərini də sadalayır:“Dözümlülük, əzmlilik, səbir, məqsəd lazımdır”.
Sonda isə yaşıdlarına səmimi tövsiyəsini verir:“Uğursuzluğu qəbul etməyi bacarmaq, seçdiyin məşğuliyyəti sevmək lazımdır”.
